ملګري ملتونه: مصنوعي ځیرکتیا د ښځو پر وړاندې د زیانمونکي منځپانګې تولید ته لاره هواره کړې
د ملګرو ملتونو د ښځو څانګې او د ماشومانو د ملاتړ صندوق (یونیسف) د مصنوعي ځیرکتیا له لارې د ښځو ضد او زورونکي محتوا د چټکې پراختیا په اړه اندېښنه څرګنده کړې او وایي، د یادې ټکنالوژۍ د خوندي او مسولانه کارونې لپاره جدي مقررات او تدابیر اړین دي.
د یاد سازمان د ښځو پر وړاندې د تاوتریخوالي د پای ته رسولو برخې مشرې، کالیوپي مېنګیرو، ویلي چې د مصنوعي ځیرکتیا له لارې د ښځو او نجونو جعلي انځورونه، جنسي بڼه لرونکي غیرحقیقي عکسونه او ایموجي، همدارنګه نور جعلي او زیانمنونکې محتوا په ډېرې اسانۍ، چټکۍ او ټیټ لګښت تولیدېدای شي، چې د ښځو د سپکاوي او ځورونې خطر زیاتوي.
د ملګرو ملتونو د ښځو څانګې دغې چارواکې له ټکنالوژۍ جوړوونکو، پالیسۍ جوړوونکو او کاروونکو غوښتي چې د مصنوعي ځیرکتیا د پراختیا او کارونې پر مهال د ښځو او نجونو امنیت، محرمیت او اساسي حقونه په لومړیتوب کې وساتي.
په همدې حال کې، د ملګرو ملتونو د ماشومانو د ملاتړ صندوق (یونیسف) هم خبرداری ورکړی چې میلیونونه ماشومان لا دمخه له مصنوعي ځیرکتیا څخه د زده کړې، د ستونزو د حل او د مشورو ترلاسه کولو لپاره ګټه اخلي، خو د دوی د خونديتوب لپاره موجود تدابیر د دې چټک پرمختګ سره سمون نه لري.
د یونیسف د معلوماتو له مخې، لږ تر لږه ۲۰ میلیونه ماشومان په لسو هېوادونو کې مصنوعي ځیرکتیا کاروي او د دې ټکنالوژۍ د کارونې کچه د لویانو په پرتله څه باندې درې برابره په چټکۍ سره لوړه شوې ده.
دغه څرګندونې د راتلونکې اوونۍ په ژنیو کې د مصنوعي ځیرکتیا په اړه د نړیوالې غونډې څخه مخکې شوې دي. د ملګرو ملتونو بنسټونه ټینګار کوي چې د مصنوعي ځیرکتیا لپاره باید د خوړو، لوبو او موټرو په څېر د خوندیتوب او تنظیم روښانه مقررات رامنځته شي، څو د دې ټکنالوژۍ ګټې خوندي او احتمالي زیانونه یې محدود شي.
