سویډن د افغان کډوالو په ستنولو څه کم یو میلیون ډالر لګولي خو تر اوسه هیڅوک نه دي ستانه شوي

د طالبانو د دفاع وزارت د جلب او جذب عمومي قوماندانۍ په پکتیکا ولایت کې د نویو سرتېرو د ګومارلو لړۍ پیل کړې او له ځوانانو یې غوښتي چې د دې ډلې د پوځ په لیکو کې شامل شي.

د طالبانو د دفاع وزارت د خبرتیا له مخې، د پوځ په لیکو کې د شاملېدو لپاره یو شمېر ځانګړي شرایط وړاندې شوي دي.

100%

په شرایطو کې راغلي چې د داوطلبانو عمر باید له ۲۰ تر ۲۴ کلونو پورې وي، د افغانستان اصلي تذکره ولري او کورنۍ یې باید د هېواد دننه ژوند وکړي.

همداراز غوښتونکي باید د سیمې د قومي مشرانو او د جومات د امام له خوا تایید شوي وي، په جنايي جرمونو محکوم نه وي او په نشه‌یي توکو او یا کومه لاعلاجه ناروغۍ اخته نه وي.

په خبرتیا کې دا هم ویل شوي چې نوماندان باید د نبوي سنتو پابند وي، د طالبانو د حکومت نافذه قوانینو ته ژمن وي او د پوځي زده‌کړو د ترلاسه کولو پوره فزیکي ځواک او روغتیا ولري.

د طالبانو د جلب او جذب قوماندانۍ ټینګار کړی چې داوطلبان د پوځي روزنې پر مهال له ځان سره د موبایل تلیفون د ګرځولو حق نه لري.

د طالبانو د دفاع وزارت ویلي چې په شرایطو برابر ځوانان کولای شي د نوملیکنې لپاره د پکتیکا ولایت د جلب او جذب قوماندانۍ ته مراجعه وکړي.

له دې وړاندې د وري پر ۳۰مه افغانستان انټرنشنل د خپلو سرچینو له قوله خبر ورکړی و، چې طالبان د افغانستان په سویلي او سویل ختیزو ولایتونو کې د امنیتي جوړښت د پیاوړتیا په هڅه کې دي او پلان لري چې لومړی د ځاځیو له قبیلې شاوخوا زر تنه د خپلو ځواکونو لیکو ته جذب کړي.

سرچینو ویلي وو، چې له هرې سرحدي ولسوالۍ نه به د قبیلو په مشوره پنځوس پنځوس تنه د سرحدي پولیسو او دفاعي قطعاتو په چوکاټ کې ځای پر ځای شي. د جذبېدونکو کسانو لپاره د طالبانو د «جهادي سابقې» په څېر شرایط هم په نظر کې نیول شوي دي.

د سرتېرو د جلب او جذب ولایتونه ډېری پر ډیورنډ کرښه دي، چې خوست، پکتیا، پکتیکا، کونړ، نورستان، کندهار، هلمند، بدخشان ولایتونه پکې شاملیږي.

د طالبانو د بهرنیو چارو وزارت د یکشنبې په ورځ وویل، چې د روغتیا نړیوال سازمان د سیمه ییز دفتر مشرې ډاکټرې حنان بلخي د افغانستان له روغتیايي سکتور سره د دغه سازمان د دوامدارو همکاریو ډاډ ورکړی.

هغې پولیو یوه نړیواله اندېښنه بللې او د دغې ناروغۍ د له منځه وړلو لپاره یې د پولیو ضد کمپاینونو په بریالي تطبیق کې دطالبانو د ملاتړ غوښتنه کړې.

وزارت ویلي، چې متقي د پولیو ضد کمپاینونو د بشپړ ملاتړ تر څنګ له سیاست نه د روغتیا، سوداګري او بشري چارو د جلا ساتلو پر اړتیا ټینګار کړی دی.

وزارت زیانه کړې چې دې لیدنه کې متقي د عامې روغتیا د نظام پر پیاوړتیا، د سرطان ناروغانو لپاره د تشخیص او درملنې د پرمختللو مرکزونو پر جوړېدو، د روغتیايي مرکزونو د تجهیز او د طبي پرسونل د ظرفیت لوړولو پر اړتیا هم ټینګار کړی.

د طالبانو د بهرنیو چارو وزرات ویلي چې په دې لیدنه کې د بلخي تر څنګ د ګېټس بنسټ رییس، د سعودي د پاچا « ملک سلمان خیریه بنسټ» مسوول، د یونېسف د سیمه ییز دفتر رییس او د متحده عربي اماراتو او قطر سفیرانو هم ګډون درلود.

د الیاس مومند پلار انګار مومند افغانستان انټرنشنل ته ویلي، درې کاله مخکې یې زوی، محمد الیاس مومند، د اختطاف چیانو له خوا لومړی وتښتول شو او وروسته ووژل شو. د هغه په وینا، د زوی د مړینې یې درې کاله پوره شوي، خو لا هم ددوی د کورنۍ زخم تازه دی او عدالت نه دی تامین شوی.

هغه ادعا کړې چې د زوی له ۱۲ قاتلینو څخه یې یوازې څلور تنه نیول شوي وو، خو د ننګرهار ابتدایي نظامي محکمې وروسته بېرته خوشې کړل. د نوموړي په وینا، د قتل دوسیه یې تر اوسه په همغه لومړۍ محکمه کې پرته ده او قاتلان ازاد ګرځي.

د انګار مومند په وینا، تېره اونۍ د ننګرهار د مرافعې عمومي رییس د ننګرهار د نظامي منسوبینو له رییس الله نظر ابوالاسد سره په غونډه کې پرېکړه کړې چې نوموړی دې نوې عریضه ثبت کړي او خپل حق دې له سره وغواړي.

د هغه په وینا، چارواکو ویلي چې د نوې عریضې له ثبت وروسته به، سره له دې چې له پېښې درې کاله تېر شوي، دوسیه له سره وڅېړل شي او د قانون له مخې به پرې پرېکړه وشي.

انګار مومند ویلي، کله ناکله دومره ناامېده شي چې فکر کوي که دا دوسیه د نامسلمانو په محکمه کې وای، ښايي ډېر مخکې به پکې انصاف شوی وای.

هغه د خپل زوی په قضیه کې د عدالت د تامین غوښتنه کړې او ویلي یې دي چې قاتلان باید ازاد ونه ګرځي او د مظلوم کورنۍ دې د عدالت په تمه کلونه انتظار ته نه پرېښودل کېږي.

د طالبانو د کډوالو وزارت د یکشنبې په ورځ وویل، چې د کډوالو په چارو کې د ملګرو ملتونو عالي کمېشنر برهام صالح او د ملګرو ملتونو د پراختايي برنامې رییس الکساندر دي کرو د کډوالو د ستونزو د ارزونې په موخه کابل ته سفر کړی.

د ملګرو متلونو د کډوالو عالي کمېشنر صالح ویلي، چې له ۲۰۲۳ کال راهیسې افغانستان ته شپږ میلیونه افغانان راستانه شوي او کابل ته د سفر موخه یې د کډوالو د ستونزو ارزول دي.

نوموړي زیاته کړې:«دا په نړۍواله کچه له لویو شمېرو ګڼل کېږي، موږ د افغانانو ملاتړ ته ژمن یو او هیله لرو چې مرستې ورته ورسېږي».

په ورته مهال د طالبانو د کډوالو وزارت مسلکي معین عبدالرحمن راشد د ملګرو ملتونو له یادو چارواکو څخه غوښتنه کړې چې د میلیونونو کډوالو د وضعیت په ښه کولو دې خپلې همکارۍ لا پراخې کړي.

ځايي سرچینو نن یکشنبه، د چنګاښ پر ۱۴مه وویل، چې طالبانو د پکتیا پوهنتون د نجونو لیلیې پر دروازه د فقې او قضا د زده کړو مرکز لوحه لګولې، خو هېڅوک په دروازه کې نه لیدل کېږي.

افغانستان انټرنشنل د پکتیا د دولتي پوهنتون د نجونو د لیلیې دروازې انځورونه هم ترلاسه کړي دي.

ځینې عیني شاهدان چې دې دروازې ته نژدې ورغلي دي، وايي، دروازې تړلې او دننه په دوه پوړیزه ودانۍ کې شاوخوا امنیتي کامرې هم لیدل کېږي.

په پکتیا پوهنتون کې هم سرچینې وايي چې د پوهنتون او د نجونو لیلیې ترمنځه لارې تړل شوې دي.

طالبانو لاتروسه ددغې لیلیې په اړه څه نه دي ویلي او نه یې هم په دې اړه معلومات شریک کړي چې د نجونو لیلیه د څه لپاره ځانګړې شوې ده.

د ځايي سرچینو د معلوماتو له مخې، د طالبانو پر نظامي مرکزونو د پاکستان له بریدونو وروسته دې ډلې خپل ځانمرګي بریدګر د پکتیا پوهنتون د نجونو په پخوانۍ لیلیه کې ځای پرځای کړل، چې له بریدونو خوندي پاتې شي.

د هېواد سوېل ختیځ، په ځانګړی توګه پکتیا، پکتیکا او خوست ولایتونه د طالبانو د کورنیو چارو وزیر سراج الدین حقاني په مشرۍ د حقاني شبکې د قدرت مرکزونه بلل کېږي.

له دې وړاندې سرچینو ویلي و، چې د ملاهبت الله او سراج الدین حقاني ترمنځ د ځانمرګو بریدګرو پر سر اختلاف دی.

سرچینو د ۱۴۰۳ کال د سلواغې میاشت کې افغانستان انټرنشنل ته وویل، چې مولوي هبت الله له خوست ولایت څخه د بدري قطعې ۶۰۰ هغه ځانمرګي بریدګر کندهار ته لېږدولي، چې د امریکايي ځواکونو او سي ای اې په پخواني پوځي کمپ چاپمن کې میشت وو.

سراج الدین حقاني ته نژدې سرچینې وايي، چې دغه ډله له ځانمرګو بریدګرو سره ځانګړې مرستې کوي او د هغوی ټول لګښتونه ور کوي.

د شواهدو پر بنسټ، په افغانستان کې د لومړي ځل لپاره د ځانمرګو بریدونو بنسټ القاعده ډلې اېښی. د امریکا د ملي امنیت شورا په ۲۰۰۰م کال کې ویلي وو، چې اسامه بن لادن په افغانستان کې د ځانمرګو بریدګرو ښوونیز مرکزونه جوړ کړي دي.

طالبانو تر دې دمه د خپلو ځانمرګو بریدګرو شمېر نه دی په ډاګه کړی.