د روسیې دفاع وزارت ویلي، اوکراین په کوستیانتینیفکا ښار او شاوخوا سیمو کې د شپږ ساعته سیمه ییز اوربند هغه وړاندیز رد کړی، چې د روسیې په وینا، د وژل شویو اوکرایني سرتېرو د جسدونو د سپارلو لپاره شوی و. اوکراین تر اوسه دروسیې د دې ادعا په اړه څه نه دي ويلي.
د روسیې پوځي قوماندانانو د جمعې په ورځ ولسمشر ولادیمیر پوتین ته ویلي وو چې د مسکو ځواکونو د کوستیانتینیفکا ښار کنټرول ترلاسه کړی، خو اوکراین دا ادعا رد کړې وه او ویلي یې و چې ځواکونه یې لا هم د ښار کنټرول په لاس کې لري.
کوستیانتینیفکا د اوکراین یو مهم ښار دی چې مسکو له اوږدې مودې راهیسې د دونېڅک سیمې په پوځي عملیاتو کې د هغه د نیولو هڅه کوي.
رویټرز لیکلي چې د اوکراین دفاع وزارت او لوی درستیز تر اوسه ددوی د برېښنالیک له لارې د تبصرې غوښتنې ته ځواب نه دی ورکړی.
