بلوچستان ایالت په ډیره بګټي ولسوالۍ کې د ډزو له امله څلور کسان وژل شوي
د بلوچستان ایالت په ډېره بګټي ولسوالۍ کې د درینجن سیمې ته نږدې د دوو ډلو ترمنځ د ډزو په پېښه کې څلور کسان وژل شوي او یو بل ټپي شوی دی.
د بلوچستان ایالت په ډېره بګټي ولسوالۍ کې د درینجن سیمې ته نږدې د دوو ډلو ترمنځ د ډزو په پېښه کې څلور کسان وژل شوي او یو بل ټپي شوی دی.
د ځايي سرچینو په وینا، نښته د پیروزاني قبیلې د کوهلي څانګې د خپلوانو ترمنځ د مالي شخړې له امله رامنځته شوې ده.
سرچینې وایي، په وژل شویو کې له یوې خوا پلار او زوی او له بلې خوا دوه وروڼه شامل دي.
دا په داسې حال کې ده چې نن سهار هم د بلوچستان د قلعه عبدالله ولسوالۍ په بدوان کلي کې د قبایلي دښمنۍ له امله څلور کسان وژل شوي او یوه ماشومه نجلۍ ټپي شوې وه.
د دغو دوو جلا پېښو سره، په یوه ورځ کې په بلوچستان کې د تاوتریخوالي له امله د وژل شویو کسانو شمېر اتو ته رسېدلی دی.
د جمهوري نظام پر مهال د افغانستان د اطلاعاتو او کلتور پخواني وزیر عبدالکریم خرم ویلي، چې پاکستان هڅه کوي د خپل تاریخي هویت د پیاوړتیا لپاره د افغانستان او هند تاریخ ته «ناسمه او انتخابي» اشاره وکړي او د سیمې د تاریخي رول په اړه ناسم روایت وړاندې کړي.
پخواني وزیر عبدالکریم خرم په خپل ایکس حساب کې د پاکستان د لومړي وزیر شهباز شریف د وروستیو څرګندونو په اړه غبرګون ښودلی او هغه یې د تاریخي واقعیتونو له «ناسم تفسیر» سره تړلې بللې دي.
خرم ویلي، شهباز شریف په ترکیه کې د یوه خبري کنفرانس پر مهال ادعا کړې وه چې د هند د نیمې وچې مسلمانانو د ۱۹۱۹څخه تر ۱۹۲۳ کلونو پورې د ترکیې د خپلواکۍ جګړې پر مهال د مالي مرستو له لارې د ترکانو ملاتړ کړی دی.
هغه زیاتوي چې پاکستان هغه مهال په رسمي ډول وجود نه درلود، او په وینا یې اسلاماباد اوس هڅه کوي د خپل هویت د جوړولو لپاره د سیمې تاریخ په انتخابي ډول وړاندې کړي.
خرم په خپل پوسټ کې لیکلي: «پاکستان غواړي په سیمهییز قدرت بدل شي، نو د خپل هویت د جوړولو په لټه کې دی او په همدې دلیل کله له افغانستانه او کله له هند څخه تاریخ او کلتور غلا کوي.»
هغه همدارنګه ادعا کړې چې په هغه تاریخي پړاو کې د افغانستان سلطنت او د افغانستان خلکو په عملي ډول له ترکیې سره د پیسو، سرو زرو او جګړهییزو مرستو ملاتړ کړی و.
د جمهوري نظام پر مهال د چارو ادارې مشر فضل محمود فضلي ویلي، چې پاکستان هڅه کوي نړیوالو ته دا قناعت ورکړي چې افغانستان د «دویم ۹/۱۱» خطر لري، خو د ده په وینا واشنګټن د وضعیت په اړه بشپړ پوهه لري او اسلاماباد په تاریخي ډول د امریکا د غوښتنو مطابق خپل دریځ بدل کړی دی.
فضل محمود فضلي په خپل ایکس حساب کې ادعا کړې، چې پاکستاني چارواکي په «یوه ناامیده هڅه» کې غواړي نړۍ، په ځانګړي ډول واشنګټن، دې ته قانع کړي چې افغانستان د «دویم ۹/۱۱» ګواښ رامنځته کوي.
هغه لیکلي، چې د امریکا متحده ایالات د وضعیت په اړه ښه خبر دي او د اسلاماباد د دریځونو تر شا سیاسي محاسبه درک کوي.
فضلي په خپل پوسټ کې د ترهګرۍ پر ضد د امریکا د جګړې پر مهال د پاکستان رول ته په اشارې ویلي، چې د هغه وخت د راپورونو له مخې د امریکا د بهرنیو چارو پخواني مرستیال ریچارډ ارمیټیج د پاکستان د استخباراتو (ISI) مشر محمود احمد ته ویلي و: «د بمبارۍ لپاره تیار اوسئ، او تیار اوسئ چې بېرته د ډبرو دورې ته ستانه شئ.»
هغه زیاتوي، چې وروسته پاکستان د امریکا له کمپاین سره یوځای شو، «میلیاردونه ډالر یې ترلاسه کړل او د پیسو په بدل کې یې هر څه ترسره کړل.»
فضلي همدارنګه د افغانستان د سولې بهیر او د طالبانو د بیا ظهور په اړه ویلي، چې اسلاماباد بیا هم د واشنګټن د غوښتنو مطابق عمل کړی، د طالبانو کوربه توب یې کړی، د هغوی د مذاکراتي ټیم په جوړولو کې یې مرسته کړې او د دوحې د خبرو لپاره یې پلاوی لېږدولی دی.
هغه په خپل پوسټ کې د تاریخي لړۍ په اړه لیکلي، چې د هغه په وینا «کله چې واشنګټن څه غواړي، د پاکستان جوړښت یې عملي کوي.»
فضلي زیاتوي، چې دا بهیر یوازې د مالي ګټو پر بنسټ ولاړ دی او د هغه په باور، «نه یوازې په تېرو وختونو کې، بلکې د راتلونکي په اړه هم ورته چلند تکرارېدای شي، نه د خپلو امنیتي ارزونو له مخې بلکې د امریکا د لومړیتوبونو پر اساس.»
پاکستان د جولای تر لسمې له ناقانونه افغان کډوالو غوښتي چې په خپله خوښه له دغه هېواده ووځي او خبرداری یې ورکړی چې له دې نېټې وروسته به د اسنادو نه لرونکو افغانانو پر ضد پراخ عملیات پیل کړي.
د پاکستان د کورنیو چارو وزارت ټولو ايالتونو ته لارښوونه کړې چې د جولای له لسمې وروسته هره ورځ افغان کډوال ونیسي او د نیول شویو کسانو راپورونه مرکز ته واستوي.
دغه پرېکړې په پاکستان، په ځانګړي ډول د بلوچستان په مرکز کوټه کې د افغان کډوالو ترمنځ د اندېښنې څپه خپره کړې ده.
محمد غوث، چې ۴۲ کاله وړاندې د جګړو او بېوزلۍ له امله کوټې ته کډه شوی، افغانستان انټرنشنل-پښتو ته وویل چې د ژوند ټولې شتمنۍ یې په پاکستان کې د مزدورۍ له لارې برابرې کړې دي.
هغه وايي: «کلونه مو د خټو په یوه کوچني کور کې ژوند وکړ. فکر مو کاوه همدا به زموږ دایمي کور وي، خو له تېرو درېیو کلونو راهیسې هره ورځ په وېره ژوند کوو. اوس له کوره هم نه شو وتلی، ځکه هر وخت دا ویره راسره وي چې پولیس به مو ونیسي او افغانستان ته به مو وشړي.»
محمد غوث زیاتوي، که افغانستان ته ستون شي، هلته نه کور لري او نه هم د ژوند د پیل کومه وسیله.
سلطان، چې هغه هم په کوټه کې مزدوري کوي، وايي څو میاشتې مخکې یې احساس کاوه چې د افغان کډوالو پر ضد عملیات کم شوي او ژوند یو څه عادي شوی، خو د حکومت تازه اعلان یې ټولې هیلې له منځه یوړې.
هغه وايي: «موږ دومره پیسې هم نه لرو چې د ستنېدو کرایه پرې ورکړو.
که افغانستان ته ولاړ شو، هلته نه کار شته او نه کاروبار نو ژوند به مو له ستونزو سره مخ شي.
هغه زیاته کړه :حکومتونه باید د انساني خواخوږۍ پر بنسټ پرېکړې وکړي، نه دا چې د میلیونونو خلکو ژوند له ناورين سره مخ کړي.»
سلطان زیاتوي چې د ده د کورنۍ ټول غړي له سخت رواني فشار سره مخ دي او د خپل راتلونکي په اړه هېڅ ډاډ نه لري.
په همدې حال کې، ملګرو ملتونو خبرداری ورکړی چې له پاکستانه د افغان کډوالو پراخې ستنېدنې د افغانستان پر لا دمخه نازک بشري وضعیت نور فشار هم زیات کړی دی.
د ملګرو ملتونو د راپور له مخې، یوازې په ۲۰۲۵ کال کې شاوخوا یو میلیون افغانان له پاکستانه په جبري یا ناوړه شرایطو کې افغانستان ته ستانه شوي او په ۲۰۲۶ کال کې هم تر اوسه ۵۳۱ زره او ۸۰۰ کسان بېرته هېواد ته راستانه شوي دي.
ملګرو ملتونو ویلي، دغه بهیر په داسې وخت کې روان دی چې د افغانستان او پاکستان ترمنځ سیاسي او امنیتي ترینګلتیا زیاته شوې او په افغانستان کې بشري وضعیت، په ځانګړي ډول د ښځو او نجونو لپاره، نور هم خراب شوی دی.
د راپور له مخې، تورخم، چې له پاکستانه د افغان کډوالو د ستنېدو تر ټولو لویه لار ده او تر کړکېچ وړاندې پرې شاوخوا ۸۰ سلنه کډوال اوښتل، د مارچ په ۳۱مه په محدود ډول بېرته پرانیستل شوه.
ملګرو ملتونو ټینګار کړی چې د افغان کډوالو ستنېدنه باید خوندي، داوطلبانه او باعزته وي او له راستنېدونکو او کوربه ټولنو سره د بشري مرستو دوام حیاتي ارزښت لري.
بل لور د پاکستان د کورنیو چارو وزارت مرستیال وزیر طلال چوهدري ویلي، له دغه هېواده د ناقانونه کډوالۍ کچه ۴۷ سلنه راټیټه شوې او د ناقانونه کډوالۍ پر ضد د اسلاماباد تګلاره د نورو هېوادونو لپاره په یوه بېلګه بدله شوې ده.
هغه زیاتوي پاکستان د ناقانونه کډوالۍ، د انسانانو د قاچاق او د کډوالو د قاچاقي شبکو پر ضد د اغېزمنو اقداماتو له امله د پام وړ بریاوې ترلاسه کړې دي.
هغه ناقانونه کډوالي یوه نړیواله ستونزه وبلله او ویې ویل، دا ننګونه د هېوادونو له پولو اوړي او هېڅ هېواد نه شي کولی په یوازې ځان ورسره مبارزه وکړي.
د بلوچستان ایالت عبدالله خان قلعه ولسوالۍ د کلي بدوان په سیمه کې نن سهار د ډزو په یوه پېښه کې څلور کسان وژل شوي دي.
د قلعه عبدالله مرستیال کمېشنر منور مګسي د افغانستان انټرنشنل پښتو سره په خبرو کې د پېښې پخلی کړی دی.
د نوموړي په وینا، په وژل شویو کسانو کې عبیدالله، ایمل، شاهد او ضیاءالرحمان شامل دي.
مرستیال کمېشنر وويل چې دا پېښه د قبایلي دښمنۍ له امله رامنځته شوې ده.
چارواکو د پېښې په اړه نورې پلټنې پیل کړې دي.
د پاکستان د کورنیو چارو وزارت مرستیال وزیر طلال چوهدري ویلي، له دغه هېواده د ناقانونه کډوالۍ کچه ۴۷ سلنه راټیټه شوې او د ناقانونه کډوالۍ پر ضد د اسلاماباد تګلاره د نورو هېوادونو لپاره هم په یوه بېلګه بدله شوې ده.
نوموړي دا څرګندونې د اتریش په پلازمېنه ویانا کې د د کډوالو د قاچاق پر ضد نړیوال ایتلاف غونډې ته د وینا پر مهال کړې دي.
هغه ناقانونه کډوالي یوه نړیواله ستونزه وبلله او ویې ویل، دا ننګونه د هېوادونو له پولو اوړي او هېڅ هېواد نه شي کولی په یوازې ځان ورسره مبارزه وکړي.
طلال چوهدري د هېوادونو ترمنځ د لا پراخې همکارۍ غوښتنه وکړه او ټینګار یې وکړ چې د کډوالو د قاچاق شبکو د له منځه وړلو او د انسانانو د قاچاق د مخنیوي لپاره ګډې نړیوالې تګلارې او همغږي اړینې دي.