ډان: د امریکا او ایران تخنیکي خبرې ښايي په اسلام‌اباد کې ترسره شي

د راپور له مخې، ټاکل شوې دا خبرې د جولای په ۱۱مه ترسره شي، خو وروستۍ پرېکړه د غونډې د ځای په اړه لا نه ده شوې. سرچینې وايي، د خبرو لپاره د سویس د بورګن‌سټاک سیمه هم په پام کې ده، خو اسلام‌اباد تر ټولو قوي احتمال لري.

ویل شوي چې په دغو خبرو کې به د ایران اټومي پروګرام، د بندیزونو نرمول، د ایران کنګل شوې شتمنۍ او د سیمې امنیتي موضوعات، په ځانګړي ډول د هرمز تنګي امنیت او د لبنان د اوربند دوام، وڅېړل شي.

راپور زیاتوي چې خبرې د ایران د ستر مذهبي مشر د جنازې مراسمو له امله ځنډېدلې وې او تمه ده تهران به د دغو مراسمو تر پای وروسته د خپل پلاوي غړي اعلان کړي.

ډیپلوماتیکې سرچینې وايي، قطر او پاکستان د دواړو هېوادونو ترمنځ د غیرمستقیمو اړیکو په اسانتیا کې مهم رول لوبوي او هڅه کوي د خبرو بهیر روان وساتي.

د راپور له مخې، د لوړې کچې مستقیمې خبرې به د جولای په درېیمه اوونۍ کې د قطر په پلازمېنه دوحه کې ترسره شي، وروسته له هغې چې تخنیکي ډلې د احتمالي هوکړې جزییات بشپړ کړي.

بلخوا، د امریکا ولسمشر ډونالډ ټرمپ ویلي، له ایران سره وروستۍ خبرې «ډېرې ښې» وې او ادعا یې کړې چې تهران د یوې هوکړې لپاره لېوالتیا لري.
په مقابل کې، د ایران د بهرنیو چارو وزارت ویلي، د امریکا او اسراییل پر وړاندې د عدالت غوښتنه به د ایران د سیاست یوه دوامداره برخه وي.