د طالبانو په واک کې دافغانستان د اوبو کمېټې (AWAP) د پیاوړتیا لپاره د ۵۵ ملي او نړیوالو بنسټونو، د ملګرو ملتونو د ادارو او نورو شریکانو په ګډون د همغږۍ ناسته شوې، چې د څښاک پاکو اوبو او د اوبو رسولو د خدمتونو پراختیا او د نړیوالو همکاریو پر پیاوړتیا پکې خبرې شوې دي.
د یادې ادارې د معلوماتو له مخې، د غونډې په پیل کې، د اقتصاد وزارت مالي او اداري معین محمد عالم جمیل، د اوبو د سرچینو د دوامدار مدیریت او د څښاک اوبو او فاضلابو د خدمتونو د پراختیا پر اهمیت خبرې کړې.
نوموړي د افغانستان د اوبو کمېټې (AWAP) رول د ملي او نړیوالو بنسټونو ترمنځ د همغږۍ په رامنځته کولو کې مهم وباله او د دې کمېټې د فعالیتونو د پیاوړتیا او پراختیا لپاره یې د عملي اقداماتو پر ترسره کولو ټینګار وکړ.
د معلوماتو له مخې، د طالبانو د دولتي شرکتونو رییس احمدجان بلال د هېواد د څښاک اوبو او فاضلابو د مدیریت په برخه کې شته اړتیاوو ته په اشارې سره، له ملي او نړیوالو بنسټونو وغوښتل چې د ښاري اوبو رسولو او فاضلابو امارتي شرکت سره د اوبو رسولو د بنسټونو د پراختیا او د فاضلابو د خدمتونو د ښه والي په برخه کې همکاري وکړي.
=
