د اسټرالیا ښځينه کرکټ لوبډلې د اووم ځل لپاره د ښځو د شل اوریز نړیوال جام اتلولي وګټله
د اسټراليا ښځينه کرکټ لوبډلې د ښځو د شل اوریز نړیوال جام په پايلوبه کې د انګلستان لوبډلې ته ماتې ورکړه او د اووم ځل لپاره یې اتلولي په خپل نوم کړه.
د انګلستان د لارډز په لوبغالي کې په ترسره شوې پایلوبه کې اسټرالیا پچه وګټله او انګلستان ته یې د توپوهنې بلنه ورکړه. د لومړۍ توپوهنې په کولو سره کوربه انګلستان په ټاکلو ۲۰ اورونو کې د ۴ لوبغاړو په سوځېدو سره ۱۵۰ منډې جوړې کړې.
د انګلستان له لوري لوبډلمشرې نیټ برنټ په مسوولانه توپوهنې سره په ۵۲ توپونو ۵۸ منډې جوړې کړې، فریا کیمپ په پای کې په چټکې توپوهنې سره په ۲۸ توپونو نابللې ۴۴ منډې جوړې کړې، چې څلور څلوریزې او یوه شپږیزه پکې شامله وه.
د اسټرالیا له لوري کیم ګارت، لوسي هیمیلټن، سوفي او اینابیل یوه یوه وېکټه ترلاسه کړه.
اسټرالیا د ۱۵۱ منډو ټاکلی هدف د درېو وېکټو په زیان په ۱۷.۱ اورونو کې ترلاسه کړ. د اسټرالیا له لوري بیت موني نیمه سلیزه ووهله، هغې په ۴۹ توپونو ۶۴ منډې جوړې کړې، او فوبي لیچفیلډ په ۳۵ توپونو د ۴۸ منډو په جوړولو سره وسوځېده. له دې بریا سره اسټرالیا د اووم ځل لپاره د ښځو د شل اوریز نړیوال جام اتله شوه.
د ښځو د نړيوال جام ۲۰۲۶م په سياليو کې ۱۲ لوبډلو برخه اخيستې چې پکې د اسټراليا، انګلستان، جنوبي افریقه، هند، بنګله دېش، پاکستان، نيدرلېنډ، ويسټ انډيز، سري لنکا، نيوزي لېنډ، سکاټ لېنډ او اييرلېنډ لوبډلې شاملې وې.
د ښځو د شل اووريز نړيوال جام دا لسم ځل و، دا نړيوال جام د جون د مياشتې په ۱۲مه نېټه پيل شوی او د جولای په پنځمه نېټه پای ته ورسېد.
