د طالبانو د دفاع وزارت وايي، د دغه وزارت سرپرست مولوي محمد یعقوب مجاهد، د بدخشان ولایت په شمال ختیځو سرحدي سیمو کې له سرحدي ځواکونو او پوستو لیدنه کړې او د چین، تاجکستان او ډیورنډ کرښې ته څېرمه پرتې ستراتیژیکې سیمې یې ارزولې دي.
د طالبانو د دفاع وزارت ویاند، عنایتالله خوارزمي، په خپل ایکس حساب کې ویلي، چې د دغه وزارت سرپرست، مولوي محمد یعقوب مجاهد، د بدخشان ولایت شمال ختیځو سرحدي سیمو ته د سفر پر مهال له سرحدي ځواکونو او پوستو لیدنه کړې ده.
د نوموړي په وینا، محمد یعقوب د بدخشان د کران او منجان ولسوالۍ، د زیباک ولسوالۍ د توپخانې، واخان او پامیر ولسوالیو ته تللی او هلته یې د سرحدي ځواکونو وضعیت له نږدې ارزولی دی.
خوارزمي ویلي، د طالبانو د دفاع وزیر د خپل سفر پر مهال د افغانستان له هغو مهمو ستراتیژیکو سرحدي سیمو څخه هم لیدنه کړې، چې له چین، تاجکستان او ډیورنډ کرښې سره نښتي دي.
د دفاع وزارت ویاند د سفر د موخې او د ترسره شویو لیدنو د جزییاتو په اړه نور معلومات نه دي ورکړي.
