د طالبانو دکندهار والي ملا محمدشیرین په افغانستان کې د ترکیې له سفیر سادین ای یلدیز سره په لیدنه کې له انقرې نه په روغتیا، کرنه، مالدارۍ، د افغان ډاکټرانو روزنه، د کډوالو ښارګوټو او نورو برخو کې د همکاریو پراخولو غوښتنه کړې ده.
د طالبانو د کندهاز ولایت د رسنیز دفتر د معلوماتو له مخې ، د ترکیې سفیر ویلي، چې انقرې د تاریخ په اوږدو کې تل هڅه کړې چې له افغانانو سره اوږه په اوږه ودرېږي او په اړینو برخو کې ورسره مرستې وکړي.
هغه د افغانستان د هراړخیز پرمختګ هیله کړې ده.
د طالبانو د کندهار ولایت مقام د خبرپاڼې له مخې، د کندهار والي د ترکیې د خدمتونو د ستاینې تر څنګ ویلي چې ترکیه یو اسلامي او د افغانستان نږدې دوست هېواد دی او د تاریخ په اوږدو کې یې له افغانستان سره مثبتې او ښې اړیکې پاللې دي.
نوموړي هیله څرګنده کړې چې د افغانستان او ترکیې ترمنځ دوه اړخیزې اړیکې او همکارۍ لا پیاوړې شي.
د کندهار والي له ترکي سفیر نه غوښتي، چې په افغانستان، په ځانګړې توګه کندهار کې، د ولسوالیو او لرې پرتو سیمو د کلینیکونو په جوړولو، د درملو او روغتیايي تجهیزاتو په برابرولو، د میرویس حوزوي او عینو مېنې ۳۵۰ بستریز روغتونونو په تجهیز، د افغان ډاکټرانو او نورو روغتیايي کارکوونکو د روزنیزو سیمینارونو په جوړولو او د کرنې او مالدارۍ په برخه کې مرسته وکړي.
