د ملګرو ملتونو د پراختیایي پروګرام (یو ان ډي پي) ویلي چې د افغانستان په ختیځ کې د تېر کال د زلزلې له امله زیانمنو کورنیو لپاره یې د ننګرهار ولایت په دره نور ولسوالۍ کې ۲۰۵ استوګنیز کورونه رغولي دي.
دغه پروګرام زیاتوي چې دا کورونه د سویلي کوریا په مالي ملاتړ د «REVIVE» پروژې له لارې جوړ شوي دي.
د یاد پروګرام په وینا، دغه کورونه چې د سیمهییزو معیارونو له مخې او د خلکو په ګډون جوړ شوي، یوازې د سرپناه لپاره نه دي، بلکې د دې لپاره هم ډیزاین شوي چې کورنۍ د راتلونکو طبیعي پېښو پر وړاندې لا ښه چمتووالی ولري.
د افغانستان په ختیځ کې د تېر کال زلزلې زرګونو کسانو ته مرګ ژوبله واړوله او نږدې یو میلیون خلک یې اغېزمن کړل چې تر اوسه هم د یادې زلزلې اغیزې او تاوانونه په بشپړ ډول له منځه ندي تللي.
