د پرتګال د فوټبال ملي لوبډلې لوبډلمشر کریسټیانو رونالډو منلې، چې د ۲۰۲۶کال نړۍوال جام به د هغه وروستی وي. نوموړي د پرتګال او هسپانیا ترمنځ د ۱۱م پړاو (۱۶ غوره لوبډلو) له مهمې سیالۍ مخکې وویل: «هیلهمن یم، چې د نن شپې لوبه مې وروستۍ لوبه نهوي».
۴۱ کلن رونالډو چې د شپږم ځل لپاره په نړۍوال جام کې ګډون کوي وویل: «پرېږدئ دا زما وروستی نړۍوال جام اوسي؛ دا به زما وروستی نړۍوال جام وي، خو هیلهمن یم چې د سبا ورځې لوبه مې وروستۍ لوبه نه وي».
د ریال مادریډ او منچسټر یونایټډ دغه پخواني مخکښ لوبغاړي ټینګار وکړ، چې له خپل مسلکي فوټبالي ژوند څخه هېڅ پښېمانه نهدی او هر وخت چې خپله پرېکړه وکړي؛ له فوټبال سره به مخه ښه وکړي.
هغه وویل: «ما د فوټبال لپاره خپله ټوله وړتیا کارولې ده. د اړتیا له امله نه؛ بلکې د مینې له مخې فوټبال کوم. کله چې دغه سفر پای ته ورسوم، وجدان به مې ارام وي».
رونالډو چې تر دې دمه یې د ۲۰۲۶کال نړۍوال جام په سیالیو کې درې ګولونه ترسره کړي وویل، له دې دورې یې د تېرو پنځو نړۍوالو جامونو پرتله ډېر خوند اخیستی دی. نوموړي زیاته کړه، سره له دې چې هسپانیا پیاوړې لوبډله ده؛ خو د پرتګال د بریا او بل پړاو ته د تګ هیله لري.
هغه همدارنګه زیاته کړه، د پرتګال او هسپانیا ترمنځ لوبې معمولا ډېرې نږدې وي او باور لري کوچني جزییات به د لوبې برخلیک وټاکي.
