د پاکستان د پوځ قوماندانانو یوځل بیا په افغانستان کې د بریدونو پر دوام ټینګار کړی
د پاکستان د پوځ د قول اردوګانو قوماندانانو په یوه غونډه کې یوځل بیا ویلي، چې د طالبانو تر واک لاندې افغان خاوره په پاکستان کې د بریدونو لپاره کارول کېږي. پاکستاني پوځ ویلي، چې د «ضرب للحق» په اډانه کې عملیاتو ته دوام ورکوي.
کابل له دې وړاندې د پاکستان دغسې ادعاوې رد کړې دي.
د دې غونډې په اعلامیه کې ویل شوي چې پاکستان باور لري د افغانستان له خاورې د «ترهګرو ډلو» د فعالیت مخنیوی د سیمهییز ثبات لپاره اړین دی او دا د طالبانو د ادارې مسوولیت دی.
پاکستاني پوځ همدارنګه ویلي چې دوی به د افغانستان له اړخه ددوی په وینا، د رامنځته کېدونکو ګواښونو پر وړاندې استخباراتي عملیاتو او امنیتي اقداماتو ته دوام ورکړي.
په اعلامیه کې دا ټینګار هم شوی چې د پاکستان پوځ د افغانستان د وضعیت په تړاو د څار او امنیتي اقداماتو کچه لوړه ساتلې ده.
د طالبانو ادارې د پاکستان ادعاوې په وار وار رد کړې دي او وايي، چې د پاکستاني وسله والو ستونزه ددغه هېواد داخلي مساله ده.
پر پاکستان په کور دننه او بهر دا نیوکې هم کیږي، چې له تېرو څو میاشتو راهیسې یې په افغانستان کې په بریدونو کې ملکي وګړي په نښه شوي او تر دې دمه د ټي پي پي هیڅ مهم غړی په بریدونو کې نه دی وژل شوی.
طالبانو له واک ته رسېدو وروسته یو پراخ کمپاین پیل کړی چې د افغانستان ځوانان د طالباني تفکر پر لور جذب کړي، خو دې هڅو سره له دې چې د هېواد ستونزې نه دي اوارې کړي بلکې وضعیت یې لا نور ترینګلی کړی دی.
په تېرو دریو کلونو کې د دیني مدرسو شمېر د تېرو شلو کلونو پرتله پنځه برابره زیات شوی، چې اوس یې شمېر نږدې ۷۰۰۰ ته رسېدلی او لا هم زیاتېږي. افغانان اړ دي چې خپل اولادونه ښوونځي ته ولېږي، آن که دا ښوونځی مدرسه هم وي.
د طالبانو د پوهنې وزارت د مدرسو او دارالحفاظونو مشر عبدالرزاق صدیق رسنیو ته ویلي و: «افغانستان یوه مذهبي ټولنه ده او هر کس باید لومړنۍ او د لوړې کچې دیني زدهکړې ولري. له همدې امله موږ د دیني مدرسو وده ضروري بولو».
خو دا فکر آن د طالبانو دننه هم پراخ ملاتړ نه لري. ځینې طالب چارواکي وایي چې افغانستان یوازې طالب او ملا ته اړتیا نه لري بلکې انجینرانو او ډاکټرانو ته هم اړتیا ده. دا وضعیت نړۍ ته یو انزوا طلبه او افراطي افغانستان معرفي کوي چې نه یوازې کولتوري ستونزې لري، بلکې سیمه او نړۍ ته قوي امنیتي ګواښ هم پېښولی شي.
که څه هم افراطي فکرونه پراخېږي، خو ټکنالوژي دا وړتیا لري چې له افراطیت سره مبارزه وکړي. انټرنټ او رسنۍ هغه څه دي چې په اوسني عصر کې ورسره ځوانان په بېلابېلو ډولونو نښلول شوي دي. د شمېرو له مخې، د افغانستان ۶۷ سلنه وګړي لږ تر لږه میاشت کې یو ځل ټلوېزیون ګوري، چې دا ۱۲ میلیونه ماشومان او ۱۴ میلیونه ځوانان رانغاړي.
نجیب پیکان زیاتوي، چې تر ټولو مهمه مسئله له دې ځوانانو سره د اړیکو جوړول دي: «افغان ځوانان په دوو برخو وېشل کېدای شي. لومړی، تحصیلکرده او ناراضه ځوانان دي چې په میدان یوازې پرېښودل شوي او د بدلون ځواک یې له لاسه ورکړی. دا هغه ځوانان دي، چې که څه هم ناهیلې دي، خو د ځان ژغورلو یوازینۍ لاره د آزادې نړۍ سره همکاري ګڼي.دویم، هغه ځوانان دي چې د طالبانو په اداره کې دي؛ هغوی افراطي شوي. هر کال نیم میلیون طالبان له مدرسو فارغېږي او د افراطیت پر لور ګام اخلي.»
د حالاتو د بدلون لپاره باید له دواړو ډلو سره کار وشي. تر ټولو مهمه لاره دا ده چې د رسنیو، خبرو اترو، کنفرانسونو او مشورو له لارې د ځوانانو ترمنځ پل جوړ شي، ترڅو هغوی انتقادي فکر ته وهڅول شي او خپل بحثونه له دین او آخرت څخه ور هاخوا هم وغځوي.
دا ځوانان کار غواړي، او د کار موندلو لپاره اړیکو ته اړتیا لري. له هغو هېوادونو درس اخیستل کېدای شي، چې د ځوانانو کچه پکې لوړه ده، او دغه ځوانان د سمې لارې پر لور هڅول کېدای شي.
