د طالبانو تر چتر لاندې د کډوالو ستونزو ته د رسېدنې عالي کمېسیون وایي، په تېره یوه ورځ کې له بېلابېلو لارو هېواد ته ۲۹۴ کورنۍ چې ۱۶۹۸ تنه کېږي، جبري راستنې او ثبت شوې دي. دغه کمېسیون زیاتوي چې تر اوسه ۵۷ زره او ۱۱۵ راستنېدونکو کورنیو ته د هستوګنې نمرې هم وېشل شوې دي.
دغه کمېسیون په خپل ورځني کاري راپور کې ویلي چې د دوشنبې په ورځ له بېلابېلو لارو هېواد ته د جبري راستنېدونکو کډوالو لپاره د ثبت، لېږد، مالي مرستو، روغتیايي خدمتونو او عامه پوهاوي په برخو کې خدمات وړاندې شوي دي.
د راپور له مخې، د ننګرهار د تورخم له لارې ۲۳۹ کورنۍ چې ۱۳۱۶ تنه غړي لري، د کندهار د سپین بولدک له لارې ۴۶ کورنۍ چې ۳۵۴ تنه غړي لري، د هرات د اسلام کلا له لارې اووه کورنۍ چې ۲۱ تنه غړي لري او د هلمند د بهرامچې له لارې دوه کورنۍ چې اووه تنه غړي لري، ثبت شوې دي.
کمېسیون ویلي چې د راستنېدونکو د دایمي مېشتېدنې او ځمکو وېش کمېټې په تېره یوه اوونۍ کې ۷۷۶ کورنیو ته د هستوګنې ځمکې نمرې وېشلې دي.
د دغه کمېسیون د معلوماتو له مخې، په ننګرهار کې ۴۵۲، فراه کې ۴۶، هلمند کې ۳۷، فاریاب کې ۱۹۰ او نیمروز کې ۵۱ راستنېدونکو کورنیو ته ځمکې ورکړل شوې دي.
راپور زیاتوي چې د وېشل شوو هستوګنیزو نمرو ټولیز شمېر تر دې مهاله ۵۷ زره او ۱۱۵ ته رسېدلی او د راستنېدونکو مهاجرینو د ثبت، مرستې او مېشتېدنې بهیر لا هم دوام لري.
