ډونالډ ټرمپ: له ایران سره به یا د هوکړې له لارې بریالي شو او یا په بله لاره
د امریکا ولسمشر ډونالډ ټرمپ ویلي، د ایران په اړه وضعیت د واشنګټن له نظره «ښه روان دی» او ټینګار یې کړی چې تهران باید هېڅکله اټومي وسلې ترلاسه نه کړي. هغه ویلي، امریکا به په هر صورت کې بریالۍ کېږي، «یا په ښه لاره او یا په داسې لاره چې ښه نه وي.»
ټرمپ دا څرګندونې د دوشنبې په ورځ د «روز ګارډن کلب» د غرمې ډوډۍ په مراسمو کې وکړې او ادعا یې وکړه چې امریکا د ایران سمندري او هوايي ځواک، رادارونه او لوړپوړي مشران له منځه وړي دي.
هغه وویل: «اوس وایي چې وضعیت یې ډېر ښه دی، خو داسې نه ده. هغوی په شدت غواړي یوې هوکړې ته ورسېږي، خو باید وګورو چې څه پېښېږي.»
د امریکا ولسمشر ټینګار وکړ چې هر ډول هوکړه باید داسې وي چې ایران د اټومي وسلو له ترلاسه کولو منع کړي.
ټرمپ زیاته کړه: «ایران باید اټومي وسله ونه لري، موضوع همدومره ساده ده. که غواړئ د ونډو یو ډېر بد بازار ووینئ، نو پرېږدئ چې اټومي وسله وکارول شي؛ هغه وخت به در وښیم چې بد بازار څه ته وایي».
هغه وویل، له ایران سره د هغو موضوعاتو په اړه هم توافقات شوي چې ډېرو کسانو باور نه درلود چې تهران به یې ومني.
ټرمپ د خپلو خبرو په پای کې وویل: «باید وګورو چې څه پېښېږي، خو موږ به په هر صورت کې بریالي شو؛ یا به په ښه لاره وي او یا به په داسې لاره چې ښه نه وي».
