د ایران د تایباد ولسوالۍ چارواکي وایي، په تېرو دریو ورځو کې ۱۵۳۰ افغانان د دوغارون له رسمي پولې د ایران د پخواني مذهبي مشر د جنازې په مراسمو کې د ګډون لپاره ایران ته داخل شوي او دا شمېر به ۲۵۰۰ ته ورسیږي. چارواکو ویلي چې دغو کسانو ته ځانګړې ویزې صادرې شوې دي.
د ایران د ایرنا خبري اژانس د راپور له مخې، د خراسان رضوي ولایت د تایباد سیمې مشر حسین جمشیدي ویلي، دغه افغانان د کابل، کندهار، مزارشریف، هرات، غزني، دایکندي او هلمند ولایتونو څخه په انفرادي او کارواني ډول د دوغارون له رسمي پولې ایران ته داخل شوي او له قانوني مراحلو وروسته مشهد ته لېږدول شوي دي.
د هغه په وینا، دغه کسان د ۳۵ بسونو په وسیله مشهد ته استول شوي دي.
جمشیدي ویلي، د ترسره شویو پلانونو له مخې، افغان وګړي یوازې تر سبا پورې فرصت لري چې د دوغارون له لارې ایران ته داخل شي او د خامنه يي د جنازې او مخه ښې په مراسمو کې ګډون وکړي.
هغه زیاته کړې، چې افغان وګړي به هره ورځ د سهار له اتو بجو څخه د ماښام تر شپږو بجو پورې د دوغارون په پوله کې منل کېږي.
د تایباد والي ویلي، هغه افغانان چې د دوغارون له لارې ایران ته داخل شوي، باید د چنګاښ په ۲۰مه او ۲۱مه بېرته افغانستان ته ستانه شي.
د نوموړي په وینا، په افغانستان کې د ایران څلورو کونسلګریو د دغو مراسمو لپاره د افغان ګډونوالو په نوم ۲۵۰۰ ویزې صادرې کړې دي.
هغه همداراز ویلي، د تایباد له ښاري او کلیوالو سیمو څخه هم په تېرو څلورو ورځو کې له ۱۷۰۰ څخه زیاتو شیعه او سني اوسېدونکو د جنازې په مراسمو کې د ګډون لپاره نوملیکنه کړې او د شخصي موټرو له لارې د تلونکو کسانو په ګډون د ګډونوالو شمېر له پنځو زرو څخه اوښتی دی.
د هغه په وینا، د دغو ولسي کاروانونو لپاره ۳۵ بسونه چمتو شوي او د تایباد د اهل سنتو ۴۵ مخکښ عالمان هم د ګډون لپاره مشهد ته ځي.
