په لوګر کې د طالبانو د پېښو پر وړاندې د چمتووالي ریاست خبر ورکړی، چې د دغه ولایت د ازرې ولسوالۍ په بېلابېلو سیمو کې د وروستیو سېلابونو له امله څلور کسان ټپیان شوي او خلکو ته درانه مالي زیانونه هم اوښتي دي.
د یاد ریاست رسنیز مسوول سالارزي فاضل ویلي، سېلابونه تېره ورځ د اکبرخېلو، برې چوترې، کوزې چوترې، جاني خېلو، تنګ، فتح خېلو او منګل درې په سیمو کې راوتلي دي. د نوموړي په وینا؛ د سېلابونو له امله ۱۴ کورونه، دوه لوی سړکونه او یوشمېر پلونه ویجاړ شوي دي.
د یاد ریاست د معلوماتو له مخې؛ سېلابونو ۲۵۰ جریبه کرنیزه ځمکه هم لهمنځه وړې او تر ۲۰ زیات څاروي تلف شوي دي. د طالبانو د پېښو پر وړاندې د چمتووالي ریاست د شمېرو له مخې؛ د روان کال له پیله تر غبرګولي میاشتې پورې د طبیعي پېښو له امله ۳۱۴ کسان مړه او ۳۹۷ نور ټپیان شوي دي.
د دغه پېښو له امله ۲زره او ۳۵ کورونه په بشپړه توګه او ۲زره او ۲۱۹ نور نیمه ویجاړ شوي دي. همدارنګه ۳۰۴ هټۍ، شاوخوا ۲۸زره او ۴۱۲ جریبه کرنیزه ځمکه او د ۴زره او ۴۱۱ بڼونو حاصلات هم لهمنځه تللي دي.
د یاد ریاست د معلوماتو له مخې؛ په دغه دې موده کې ۲زره او ۱۱۲ څاروي هم تلف شوي او په ټولیز ډول ۱۹زره او ۲۲۴ کورنۍ د طبیعي پېښو له امله زیانمنې شوې دي.
