د سېشنبې په ورځ به په کندهار او هلمند کې د پولیو ضد واکسین نوی کمپاین پیل شي
د «له پولیو پاک افغانستان» بنسټ اعلان کړی چې د هېواد په یو شمېر ولایتونو کې د سېشنبې په ورځ د ماشومانو د ګوزڼ (پولیو) ضد واکسین نوی کمپاین پیلېږي.
د «له پولیو پاک افغانستان» بنسټ اعلان کړی چې د هېواد په یو شمېر ولایتونو کې د سېشنبې په ورځ د ماشومانو د ګوزڼ (پولیو) ضد واکسین نوی کمپاین پیلېږي.
دغه بنسټ د دوشنبې په ورځ، د چنګاښ په ۱۵مه، په ایکس پاڼه کې لیکلي چې د پولیو ضد واکسین کمپاین به د سېشنبې په ورځ د کندهار ښار، د هلمند ولایت مرکز لښکرګاه او د دغو دواړو ولایتونو په یو شمېر ولسوالیو کې ترسره شي.
بنسټ له ټولو کورنیو غوښتي چې خپل تر پنځو کلونو کم عمره ماشومان واکسین کړي، څو په هېواد کې د پولیو ناروغۍ د خپرېدو مخه ونیول شي.
د «له پولیو پاک افغانستان» بنسټ ټینګار کړی چې د پولیو ضد واکسین د دې ناروغۍ د بشپړ له منځه وړلو لپاره تر ټولو اغېزمنه لار ده او د کمپاین بریا د کورنیو له همکارۍ سره مستقیم تړاو لري.
له دې وړاندې د ملګرو ملتونو د ماشومانو ملاتړ صندوق (یونیسف) هم ویلي وو چې د ماشومانو ګوزڼ یا پولیو درملنه نه لري، خو د واکسین له لارې یې مخنیوی ممکن دی او هر ماشوم باید د دې ناروغۍ پر وړاندې خوندي شي.
افغانستان او پاکستان لا هم د نړۍ هغه دوه هېوادونه دي چې د پولیو ناروغي پکې په بشپړ ډول له منځه نه ده تللې، او روغتیايي ادارې په پرلهپسې ډول د واکسین کمپاینونه د دغې ناروغۍ د محوې لپاره مهم بولي.
