ټرمپ د ناټو له سرمشریزې وروسته د اوکراین په تړاو له پوتین سره خبرې کوي

کرملین د دوشنبې په ورځ وویل چې د روسیې ولسمشر ولادیمیر پوتین او د امریکا ولسمشر ډونالډ ټرمپ د اونۍ په پای کې په ټلیفوني خبرو کې پر دې هوکړه کړې چې دوی به په نږدې راتلونکي کې بیا تماسونه ولري، چې دا ښيي ښایي دواړه مشران به د همدې اونۍ په ترڅ کې یا د ناټو له سرمشریزې وروسته بیا خبرې وکړي.

ټرمپ پلان لري چې د اوکراین له ولسمشر ولادیمیر زیلېنسکي سره د چارشنبې په ورځ په ترکیه کې وویني.

یو لوړپوړي امریکایي چارواکي د یکشنبې په ورځ وویل چې د دې لیدنې هدف د اوکراین د جګړې د پای ته رسولو لپاره تازه هڅه ده.

همدغه چارواکي وویل چې ټرمپ به احتمالا له زیلېنسکي سره تر خبرو وروسته له پوتین سره هم تماس ونیسي.

د دوشنبې په ورځ چې ترې وپوښتل شول ایا ټرمپ به له زیلېنسکي وروسته له پوتین سره ټیلیفوني اړیکه ونیسي، د کرملین ویاند دیمیتري پسکوف خبریالانو ته وویل، « هو، بالکل، ولسمشر پوتین او ولسمشر ټرمپ دواړو موافقه کړې چې د دوی اړیکې به په نږدې راتلونکي کې دوام ومومي».

پسکوف وویل چې ټرمپ د اوکراین د شخړې په اړه یوڅه ثابت دریځ لري.