د طالبانو عامې روغتیا وزارت وایي، د روغتیا نړیوال سازمان (ډبلیو ایچ او) د سرطان د کنټرول ملي پروګرام ته یو شمېر اړین طبي تجهیزات سپارلي دي. د وزارت په وینا، دغه تجهیزات د سرطان د تشخیص او درملنې د خدمتونو د پیاوړتیا په موخه د نړیوالو روغتیايي شریکانو په غونډه کې وسپارل شول.
دغه وزارت په یوه خپره کړې خبرپاڼه کې ویلي، د سرطان د تشخیص او درملنې په روغتون کې د نړیوالو روغتیايي شریکانو غونډه جوړه شوې وه، چې پکې د قطر سفیر، د روغتیا نړیوال سازمان استازو، د وزارت مرکزي رییسانو، د سرطان د کنټرول ملي پروګرام مسولانو او د یاد روغتون روغتیايي کارکوونکو ګډون کړی و.
د خبرپاڼې له مخې، په غونډه کې د روغتیايي همکاریو د پراختیا، دوام او پیاوړتیا په اړه بحث او د نظرونو تبادله وشوه.
د طالبانو د عامې روغتیا وزارت د روغتیايي خدمتونو مرستیال، مولوي عبدالولي حقاني، د روغتیا نړیوال سازمان له همکاریو مننه وکړه او ویې ویل: «د نننۍ غونډې موخه یوازې د طبي تجهیزاتو سپارل نه دي، بلکې دا د روغتیا په بېلابېلو برخو کې د ګډو همکاریو څرګندونه هم ده.»
د خبرپاڼې له مخې، په افغانستان کې د قطر سفیر او د روغتیا نړیوال سازمان مسولانو هم په خپلو ویناوو کې د روغتیايي همکاریو پر دوام ټینګار وکړ او د افغانستان د روغتیايي سکټور د پراختیا لپاره یې د خپلو مرستو او ملاتړ د دوام ډاډ څرګند کړ.
