د طالبانو د سمنګان ولایت امنیه قوماندانۍ وایي، د بلخ–سمنګان پر لویه لار د یوه مسافر وړونکي ۵۸۰ ډوله بس او یوه بار وړونکي ټېلر د ټکر له امله د بس چلوونکی مړ شوی او نهه مسافر ټپیان شوي دي.
د طالبانو د سمنګان د پولیسو ویاند، حشمتالله رحماني، ویلي چې دغه پېښه د دوشنبې په ورځ، د چنګاښ په ۱۵مه، سهار وختي د سمنګان ولایت د خُلم ولسوالۍ په اړوند سیمه کې رامنځته شوې ده.
د هغه په وینا، د پېښې له امله د ۵۸۰ ډوله بس چلوونکي خپل ژوند له لاسه ورکړی او نهه تنه سپاره مسافر ټپیان شوي دي.
دا په داسې حال کې ده چې نن سهار په هېواد کې دا دویمه لویه ترافیکي پېښه ده.
تر دې وړاندې د زابل ولایت په مربوطاتو کې هم د یوه مسافر وړونکي بس د چپه کېدو له امله یو تن مړ او ۲۸ نور ټپیان شوي وو.
په افغانستان کې د ترافیکي پېښو ډېری لاملونه د سړکونو خراب وضعیت، د ترافیکي اصولو نه مراعات، بېاحتیاطي او له ټاکلي حده د زیات سرعت کارول بلل کېږي.
