د طالبانو د کانونو او پټرولېم وزارت په یوه اعلامیه کې ویلي، چې د افغانستان په خاوره کې د ټاپي پروژې د پلي کېدو چارې په چټکۍ او منظم ډول روانې دي. د دغه وزارت د معلوماتو له مخې، تر اوسه پورې ۱۰۱ کیلومټره نللیکه غځول شوې او ۱۲۶ کیلومټره مسیر د کار لپاره چمتو شوی دی.
د طالبانو د کانونو او پټرولېم وزارت نن دوشنبه، د چنګاښ پر ۱۵مه په یوه خبرپاڼه کې ویلي، چې دا مهال په بېلابېلو برخو کې د مسیر د چمتو کولو، د نللیکو او اړینو تجهیزاتو د لېږد، د جرونو د کیندلو او د نللیکو د نښلونې او خښولو چارې دوام لري.
دغه راز د پروژې په اوږدو کې د څارنې لپاره ۱۰۸ کیلومټره سړک هم جوړ شوی دی.
د طالبانو د کانونو او پټرولېم وزارت زیاته کړې، چې د نللیکې د خښولو لپاره د ۷۰.۲ کیلومټرو په اوږدوالي جرونه کیندل شوي او تر دې دمه شاوخوا ۳۶ کیلومټره نللیکه تر ځمکې لاندې خښه شوې ده.
د ټاپي پروژې د چارو د لا چټکتیا لپاره، ۸۹.۵ کیلومټره نورې نللیکې هم د پروژې ساحې ته لېږدول شوې دي.
دغه وزارت د ټاپي د ګازو نللیکې پروژه د افغانستان لپاره یوه له مهمو ستراتیژیکو او اقتصادي پروژو بللې ده.
د یاد وزارت په وینا، د دې پروژې په بشپړېدو سره به د انرژۍ د لېږد، د ترانزیټي عوایدو د زیاتوالي، د کارموندنې د فرصتونو د رامنځته کېدو او د اقتصادي ودې په برخه کې پرمختګونه وشي.
