د طالبانو د کورنیو چارو وزارت وایي، د نشهيي توکو پر وړاندې د مبارزې پولیسو په هرات، ننګرهار، پکتیا او جوزجان ولایتونو کې د عملیاتو پر مهال د نشه یي توکو د قاچاق او خرڅلاو په تور ۳۰ کسان نیولي او د نشهيي توکو د پروسس یوه کارخونه یې کشف او له منځه وړې ده.
دغه وزارت په یوه خبرپاڼه کې ویلي چې د نشهيي توکو پر وړاندې د مبارزې پولیسو په یادو څلورو ولایتونو کې په څو جلا عملیاتو کې د نشهيي توکو د قاچاق او پلور په تړاو ۳۰ کسان نیولي دي.
د خبرپاڼې له مخې، په دغو عملیاتو کې د نشهيي توکو د پروسس یوه کارخونه هم کشف او ویجاړه شوې ده.
دغه وزارت زیاتوي چې له نیول شویو کسانو څخه ۴ زره او ۵۷۸ دانې نشهيي ټابلیټونه، ۵۳ کیلوګرامه هغه توکي چې د شیشې د جوړولو په ترکیب کې کارېږي، او همدارنګه یو شمېر چرس، شیشه او هیروین ترلاسه شوي دي.
د طالبانو د کورنیو چارو وزارت د نیول شویو کسانو د هویت او د عملیاتو د کره ځایونو په اړه نور جزییات نه دي ورکړي.
