د طالبانو د پېښو پر وړاندې د چمتووالي او مبارزې اداره وایي، د دې ادارې له مشر او په افغانستان کې د سره صلیب نړیوالې کمېټې د رییس ترمنځ په کتنه کې د پېښو د مدیریت، بېړنیو حالاتو ته د رسېدنې او بشري خدمتونو د وړاندې کولو په برخو کې د دوهاړخیزو همکاریو د پراختیا په اړه خبرې شوې دي.
د دغه ادارې په خبرپاڼه کې راغلي، د دې ادارې مشر، ملا نورالدین ترابي، په کابل کې په افغانستان کې د سره صلیب نړیوالې کمېټې له رییس یوانیس بروار، د پروګرامونو له رییس ایوان ډیویسن او د دې کمېټې له سلاکار عزتګل سره کتلي دي.
د خبرپاڼې له مخې، ترابي په دې لیدنه کې په افغانستان کې د سره صلیب نړیوالې کمېټې د نوي رییس د ګمارنې هرکلی کړی او هیله یې څرګنده کړې چې د دواړو لورو ترمنځ به ګډې همکارۍ نورې هم پراخې شي.
هغه ویلي، د طالبانو اداره د سره صلیب نړیوالې کمېټې، د سره صلیب او سرې میاشتې د ټولنو نړیوال فدراسیون او د افغاني سرې میاشتې ټولنې سره د ګډو بشري پروګرامونو د پلي کولو او همکارۍ لپاره بشپړ چمتووالی لري.
په ورته مهال، د سره صلیب نړیوالې کمېټې رییس یوانیس بروار، ویلي چې یاد بنسټ چمتو دی د بشري پروګرامونو د ملاتړ، د کارکوونکو د ظرفیت لوړولو او د تخنیکي همکاریو د پراختیا په برخو کې خپلې مرستې دوامداره وساتي.
د خبرپاڼې له مخې، په دې ناسته کې دواړو لورو په بېړنیو حالاتو کې د معلوماتو د شریکولو د اغېزمن مېکانېزم پر جوړولو، د ماینونو او ناچاوده توکو قربانیانو ته پر رسېدنې، د پېښو اړوندو کلینیکونو پر ملاتړ، د جګړو د ټپیانو پر درملنې، د لټون او ژغورنې د ټیمونو د وړتیاوو پر لوړولو او د پېښو د مدیریت په برخه کې د همکاریو د پراختیا په اړه هم بحث او د نظرونو تبادله کړې ده.
