د طالبانو د ټرانسپورټ او هوايي چلند وزارت د هوا پوهنې ادارې ویلي چې د افغانستان په یو شمېر ولایتونو کې د سختو ورښتونو، تالندې او برېښنا، تېزو بادونو او ناڅاپي سېلابونو د راوتلو اټکل شوی دی.
یادې ادارې د دوشنبې په ورځ، د چنګاښ په ۱۵مه، په خپره کړې خبرپاڼه کې ویلي چې دغه د هوا وضعیت د سبا ورځې لپاره د هېواد په نهو ولایتونو کې وړاندوینه شوی دی.
د خبرپاڼې له مخې، بدخشان، نورستان، کونړ، ننګرهار، لوګر، پکتیا، خوست، پکتیکا او غزني هغه ولایتونه دي چې د سختو بارانونو او احتمالي سېلابونو له ګواښ سره مخ دي.
د هواپوهنې ادارې ویلي چې په دغو ولایتونو کې د باران کچه د بېلابېلو سیمو له مخې له ۱۰ تر ۳۰ میلیمترو پورې اټکل شوې ده.
دغه ادارې همداراز خبرداری ورکړی چې په مرکزي، سوېل ختیځو، سوېلي او لوېدیځو ولایتونو کې د دوړو له طوفانونو سره د ملګرو تېزو بادونو د لګېدو احتمال هم شته.
د خبرپاڼې له مخې، د دغو بادونو چټکتیا په بېلابېلو سیمو کې له ۵۰ څخه تر ۹۰ کیلومترو پورې په ساعت کې اټکل شوې ده.
د طالبانو د هوا پوهنې ادارې له خلکو غوښتي چې د سختو بارانونو، سېلابونو او تېزو بادونو له امله د احتمالي زیانونو د مخنیوي لپاره لازم احتیاطي تدابیر ونیسي.
