د تېر جمهوري نظام د عامې روغتیا پخوانۍ وزیره ثریا دلیل، وایي چې ملګري ملتونه طالبان د افغانستان د رسمي حکومت په توګه په رسمیت نه پېژني او له همدې امله دغه ډله د دې سازمان په غونډو کې د ګډون لپاره نه بلل کېږي.
د اغلې دلیل په وینا، د روغتیا نړیوال سازمان د ملګرو ملتونو یوه فرعي څانګه ده او په پرېکړه لیکونو، رایې ورکولو او پرېکړو کې د هېوادونو استازولي د ملګرو ملتونو له عمومي پرېکړو سره همغږې وي.
هغې زیاته کړې، څرنګه چې ملګري ملتونه طالبان په رسمیت نه پېژني، نو ځکه دوی د پرېکړو او رایې ورکولو په غونډو کې د ګډون حق نه لري او د هېوادونو استازولي د ملګرو ملتونو د پرېکړې پر بنسټ کېږي. د روغتیا پخوانۍ وزیرې همدارنګه اشاره کړې، چې د افغانستان ملي درې رنګه بیرغ لا هم د ملګرو ملتونو په مقر کې رپاند دی، چې دا د طالبانو د حکومت د نه رسمیت پېژندنې ښکاره نښه ده.
تېره ورځ د طالبانو د ریاست الوزرا اداري مرستیال عبدالسلام حنفي کابل کې یوې غونډې ته وویل چې دوی د روغتیا اړوند نړیوالو ناستو کې د ګډون لپاره نه بلل کېږي.
د هغه دا ګیله داسې مهال ده چې د افغانستان روغتیایي سکټور د ګړنګ پر غاړه ولاړ دی او د امریکا پراختیایي مرستو له بندیدو سره په ټول هېواد کې لسګونه روغتیایي مرکزونه تړل شوې دي. د روغتیا نړیوال سازمان په وینا، د دغو مرستو د بندیدو او روغتیایي مرکزونو د تړل کېدو له امله په افغانستان کې د مور او ماشوم د مړینې کچه تر پخوا ډېره شوې ده.
