د ایران د تایباد والي حسین جمشیدي ویلي، تراوسه له افغانستان نه تر ۱۶۵۰ ډېر کسان د خامنهيي د جنازې په مراسمو کې د ګډون او د امام رضا زیارت لپاره ایران ته رسېدلي دي. نوموړي زیاته کړې، د خامنهیي د جنازې په مراسمو کې د ګډون لپاره د افغان مېلمنو لپاره ۲۵۰۰ ویزې صادرې شوې دي.
نوموړي زیاته کړه: «د افغانستان خلکو غوښتل، چې د خامنهیي د جنازې په مراسمو کې ګډون وکړي؛ نو له همدې امله افغان وګړو ته ۲۵۰۰ اووه ورځنۍ ویزې ورکړل شوې دي».
د تایباد والي وویل، تر وړمې ورځې پورې ۶۵۰ کسان او پرون هم نږدې زر کسان ایران ته داخل شوي او تمه کېږي چې پاتې کسان هم تر نن ایران ته ورسېږي. جمشیدي مشهد ښار ته د دغه افغان مېلمنو د لېږد په اړه وویل، د بهرنیو وګړو عمومي ریاست اړین تدابیر نیولي؛ څو د دغه کسانو سفر په ښه ډول ترسره شي.
هغه زیاته کړه، د پولې په دروازه کې د افغانانو د هرکلي او خدمتونو لپاره لازم ترتیبات نیول شوي. تېره ورځ د ایران د تایباد چارواکو ویلي و، په تېرو درېیو ورځو کې ۱۵۳۰ افغانان د دوغارون له لارې د ایران د پخواني مشر د جنازې په مراسمو کې د ګډون لپاره ایران ته داخل شوي او دغه شمېر به ۲۵۰۰ ته ورسېږي.
