بشرا ګوهر: پاکستان پښتانه د «ښو او بدو طالبانو» په جګړه کې ښکېل کړي
په پاکستان کې د بشري حقونو پېژندل شوې پښتنې فعالې بشرا ګوهر، د پاکستان پر امنیتي ځواکونو او د بلوچستان پر حکومت سختې نیوکې کړې دي او پوښتنه یې کړې چې که عام وګړي له «طالب ترهګرو سره جګړې» ته اړ کېږي، نو امنیتي ځواکونه د څه لپاره دي.
مېرمن ګوهر خبرداری ورکړی چې د «ښو» او «بدو» طالبانو په جګړه کې د پښتنو ښکېلول په سیمه کې د کورنۍ جګړې د پیلولو په مانا دي. د هغې په وینا، په پښتون مېشته سیمو کې ګډوډي او انارشي په سیمه کې د یو بل نیابتي جنګ لپاره لاره هواروي.
دې پښتنې فعالې د اندېښنې په څرګندولو سره زیاته کړې چې په دې نوي نیابتي جنګ کې به یو ځل بیا د دوی ماشومان د جګړې د سون توکو په توګه وکارول شي. هغې همدارنګه پوښتنه کړې چې چا دا نیابتي ډلې په سیمه کې ځای پر ځای کړې او پیاوړې کړې دي.
دا څرګندونې په داسې حال کې کېږي چې په پښتون مېشته سیمو او بلوچستان کې د ناامنیو او وسله والو بریدونو له امله د ځايي خلکو اندېښنې په بې ساري توګه زیاتې شوې دي او عام خلک احساسوي چې دولتي ځواکونه د دوی په ساتنه کې پاتې راغلي دي.
په سیمه کې د دغو ناامنیو په لړ کې، تحریک طالبان پاکستان (ټيټيپي) په دې وروستیو کې د بلوچستان ایالت په زیارت سیمه کې د پولیسو پر یوې پوستې د برید مسوولیت منلی دی. دغې ډلې ادعا کړې چې په دغه برید کې یې له ۲۰ څخه زیاتو پاکستاني ځواکونو ته مرګ ژوبله اړولې ده، چې دا په سیمه کې د روان تاوتریخوالي او ناامنیو کچه ښيي.
