د افغانستان د غالۍ تولیدوونکو او صادروونکو ټولنې د طالبانو د سوداګرۍ له وزیر نورالدین عزیزي سره د ځمکې نشتوالي، په استوګنیزو سیمو کې د فعالیت او د غالیو د ډیزاین کمښت په اړه خبرې کړې دي. عزیزي په غالیو کې سور رنګ د افغانانو د سرلوړۍ نښه بللې ده.
د طالبانو د صنعت او سوداګرۍ وزارت د معلوماتو له مخې، د افغانستان د غالۍ تولیدوونکو او صادروونکو ټولنې غړو ویلي، چې د اتحادیې ټول غړي شرکتونه لري او د فعالیت جوازونه یې د صنعت او سوداګرۍ وزارت څخه ترلاسه کړي دي.
دوی د ځمکې د نشتوالي، په استوګنیزو سیمو کې د فعالیت، د غالیو د ډیزاین کمښت په اړه له وزارت څخه د همکارۍ غوښتنه کړې.
د طالبانو د صنعت او سوداګرۍ وزیر، نورالدین عزیزي د اتحادیې له غړو سره په خبرو کې ويلي چې د افغانستان په غالیو کې سور رنګ د افغانانو د عزت او سرلوړۍ نښه ده.
