پيټيای له عمران خان سره د ملاقات لپاره د ۶ وکيلانو نوملړ د اډياله زندان چارواکو ته لېږلی
د پاکستان تحريک انصاف ګوند عمومي منشي سلمان اکرم راجا د هغو وکيلانو نوملړ اعلان کړی، چې غواړي په اډياله زندان کې د یاد ګوند بنسټګر او د پاکستان پخواني لومړي وزیر عمران خان سره ملاقات وکړي.
د ډان ورځپاڼې د راپور له مخې؛ اويس يونس چوهدري چې د پيټيای او د عمران خان د کورنۍ له لوري زندان ادارې ته د ملاقات لپاره د نوملړ سپارلو مسوول و، د دوشنبې په ورځ د اډياله زندان چارواکو ته د شپږو وکيلانو نومونه ولېږل.
د ملاقات لپاره ټاکل شويو وکيلانو کې بېرېسټر ګوهر علي خان، سلمان اکرم راجا، خالد يوسف چوهدري، فتحالله برکي، حسنين مرتضی سمبل او شهباز احمد سيال شامل دي. له دې سره د عمران خان خويندې هم د اډياله زندان مخې ته رسېدلې؛ څو د اسلاماباد سترې محکمې د حکم عملي کېدو غوښتنه وکړي.
د يادونې وړ ده، چې د اسلاماباد سترې محکمې د زندان ادارې ته لارښوونه کړې چې هره سېشنبه دې عمران خان ته له خپلو وکيلانو او د کورنۍ له غړو سره د ملاقات زمينه برابره شي او هره پنجشنبه دې د ګوند مشرانو ته د ملاقات اجازه ورکړل شي.
خو د پاکستان تحريک انصاف ګوند مشران وايي، سره له دې چې د محکمې د حکم له صادرېدو څو مياشتې تېرې شوې لاهم پرې په بشپړ ډول عمل نهدی شوی چې له امله يې د ګوند غړي او د عمران خان کورنۍ له پرلهپسې ستونزو سره مخ شوي دي.
