بنیامین نتنیاهو: زه او ټرمپ د ایران د اساسي مسایلو په اړه همغږي او ګډ دریځ لرو
د اسراییل لومړي وزیر بنیامین نتنیاهو، ویلي چې د امریکا د ولسمشر ډونالډ ټرمپ سره د ایران په تړاو د ځینو اختلافونو سربېره، د دواړو هېوادونو مشران د اساسي مسایلو په اړه همغږي او ګډ دریځ لري.
نتنیاهو د سېشنبې په ورځ له سياېناېن شبکې سره په مرکه کې وویل، که څه هم د ایران د موضوع په اړه کله ناکله د هغه او ټرمپ ترمنځ د نظر اختلاف رامنځته کېږي، خو د مهمو او بنسټیزو موضوعاتو په اړه دواړه یو شان لیدلوری لري.
د اسراییل لومړي وزیر ټینګار وکړ چې د تهران د اټومي پروګرام او د سیمې د امنیت په څېر مهمو موضوعاتو کې د واشنګټن او تلابیب همغږي دوام لري.
د هغه څرګندونې داسې مهال کېږي چې په وروستیو اوونیو کې د ایران د اټومي پروګرام او د امریکا او ایران ترمنځ د احتمالي خبرو اترو په اړه بېلابېل بحثونه او اټکلونه زیات شوي دي.
