په پاکستان کې د افغان کډوالو پر ضد د نیونې او جبري اېستلو لړۍ چټکه شوې ده. د پنجاب ایالت پولیسو خبر ورکړی، چې تېره ورځ د دغه ایالت له بېلابېلو سیمو تر ۵۰ ډېر افغان کډوال نیول شوي او د کډوالو د ساتنې مرکز ته لېږدول شوي دي.
د پولیسو په وینا؛ د نیول شویو کسانو په ډله کې د افغان تابعیت (اېسيسي) کارت لرونکي هم شامل دي، چې له دغه پنډغالو به په مستقیم ډول افغانستان ته ستانه کړای شي. پولیسو زیاته کړې، چې د دغه کسانو د کورنۍ غړي به هم له دوی سره یوځای ونیول شي او لنډمهاله پنډغالو ته به ولېږدول شي.
دا په داسې حال کې ده، چې د پاکستان په بېلابېلو برخو کې هره ورځ سلګونه افغان کډوال نیول کېږي او د تورخم او چمن له لارو بېرته افغانستان ته ستنول کېږي.
د لنډي کوتل د مرستیال ولسوال دفتر ویلي، تېره ورځ له حمزه بابا پنډغالي څخه ۳۳۵ افغان کورنۍ چې ټولټال ۱۱۳۱ کسان کېږي؛ د تورخم له لارې افغانستان ته په جبري توګه ستنې کړای شوې دي.
د ځایي چارواکو په وینا؛ یادې کورنۍ تر دې وړاندې د خیبر پښتونخوا په بېلابېلو ولسوالیو او د پاکستان په نورو ښارونو کې مېشتې وې.
