حنفي: افغان کډوال د ټولو نړیوالو قوانینو او د ګاونډیتوب د اصولو خلاف په زور اخراج شول

د طالبانو دبهرنیو چارو وزارت د خبرپاڼې له مخې، امیرخان متقي د ملګرو ملتونو د پراختیايي پروګرام (UNDP) له اداره کوونکي الکساندر ډي کرو او د ملګرو ملتونو د کډوالو عالي کمېشنر(UNHCR) برهم احمد صالح سره د افغان کډوالو د جبري ایستلو او د هغوی د راستنېدو پر مهال د رامنځته کېدونکو بشري ستونزو په اړه خپلې اندېښنې شریکې کړې دي.

متقي ویلي چې دواړو ادارو د راستنېدونکو د هرکلي او لومړنیو خدمتونو لپاره پراخ اقدامات کړي، خو د دایمي مېشتېدو، د معیشت د برابرولو او د ژوند د شرایطو د ښه والي لپاره لا ډېرو پراختیايي همکاریو ته اړتیا شته.

متقي د کوکنارو د کښت له منځه وړل یوه مهمه لاسته راوړنه بللې خو د بدیل معیشت، کرنیزو پروژو، د خصوصي سکټور پیاوړتیا او د کارموندنې پروګرامونو پلي کول یې د دې بریا د دوام لپاره اړین بللي دي.

نوموړي همدارنګه د هغو افغانانو ستونزې یادې کړې چې په ځینو هېوادونو کې د هویتي اسنادو د نشتوالي له امله له قانوني ستونزو او توقیف سره مخ دي او په دې برخه کې یې د ملګرو ملتونو د کډوالو له عالي کمېشنرۍ د همکارۍ غوښتنه کړې ده.

د طالبانو د بهرنیو چارو وزارت په وینا، د ملګرو ملتونو د پراختیايي پروګرام (UNDP) اداره کوونکي الکساندر ډي کرو،په افغانستان کې امنیت، ټولیز ثبات او د کوکنارو د کښت له منځه وړل مثبت پرمختګونه وبلل او زیاته یې کړه، چې اوس باید د بشري مرستو ترڅنګ د اقتصادي ودې، د خصوصي سکټور د پیاوړتیا، کارموندنې، بدیل معیشت او بنسټیزو خدمتونو په برخو کې هم عملي ګامونه واخیستل شي.

وزارت د ملګرو ملتونو د کډوالو عالي کمېشنر برهم احمد صالح له قوله ویلي چې د کډوالو عالي کمېشنري د افغان کډوالو د جبري ایستلو ملاتړ نه کوي او هڅه کوي له ګاونډیو هېوادونو سره خبرې وکړي، څو د افغان کډوالو ستنېدل په داوطلبانه، خوندي، باعزته او انساني ډول ترسره شي.

هغه زیاته کړې چې د افغانستان، پاکستان او ایران ترمنځ د درې اړخیزو همکاریو د میکانېزمونو پر پیاوړتیا هم کار روان دی، څو د افغان کډوالو ستونزو ته دوامدار او مناسب حل وموندل شي.

د ملګرو ملتونو د پراختیايي پروګرام ادارې نن سې شنبه، د چنګاښ پر ۱۵مه ویلي، چې ددې ادارې رییس الکساندر ډي کرو او د ملګرو ملتونو د کډوالو عالي کمېشنر برهم صالح د بلخ ولایت مزارشریف ښار ته د یوه ګډ سفر په ترڅ کې له راستنو شویو غالۍ اوبدونکو سره کتلي دي.

په دې لیدنو کې دغو لوړپوړو نړیوالو چارواکو په مستقیم ډول د راستنېدونکو او بې‌ځایه شویو کسانو ستونزې، غوښتنې او د خدماتو، خوندیتوب او معیشت په برخو کې د دوی اړتیاوې اورېدلې دي.

یادې ادارې ویلي، چې دوی د دغو زیانمنو ډلو د ژوند د بیا رغولو لپاره پر ملاتړ او د سرچینو پر برابرولو ټینګار کړی دی.

ډي کرو او برهم صالح د خپل سفر په ترڅ کې په مزارشریف کې له ښځینه فعالینو سره د هغوی فعالیتونه هم څیړلي دي.

په دې لیدنه کې د کډوالو لپاره د دایمي حل‌لارو پر موندلو او په ټولنه کې د هغوی د اوږدمهاله شته والي، ادغام او ثبات پر پیاوړتیا خبرې شوې دي.

دغه ګډ پلاوي د سیمه ییزو ټولنو رول هم د راستنېدونکو د ادغام په پروسه کې مهم بللی دی.

د طالبانو د صنعت او سوداګرۍ وزارت د معلوماتو له مخې، د افغانستان د غالۍ تولیدوونکو او صادروونکو ټولنې غړو ویلي، چې د اتحادیې ټول غړي شرکتونه لري او د فعالیت جوازونه یې د صنعت او سوداګرۍ وزارت څخه ترلاسه کړي دي.

دوی د ځمکې د نشتوالي، په استوګنیزو سیمو کې د فعالیت، د غالیو د ډیزاین کمښت په اړه له وزارت څخه د همکارۍ غوښتنه کړې.

د طالبانو د صنعت او سوداګرۍ وزیر، نورالدین عزیزي د اتحادیې له غړو سره په خبرو کې ويلي چې د افغانستان په غالیو کې سور رنګ د افغانانو د عزت او سرلوړۍ نښه ده.

د طالبانو د یاد وزرات د معلوماتو له مخې، د کډوالو په چارو کې د ملګرو ملتونو عالي کمېشنر، برهام صالح ويلي چې کابل ته یې د سفر موخه د افغان کډوالو د وضعیت ارزول، د برنامو د پلي کېدو څارنه او له اړو کسانو سره له نږدې لیدنه ده.

صالح له پاکستان او ایران څخه د افغانانو جبري ایستل او د هغوی پر وړاندې وضعیت د اندېښنې وړ وباله او ویې ویل، چې د افغان کډوالو د ستونزو د حل او باعزته راستنېدو لپاره درې اړخیزو او څلور اړخیزو ناستو ته اړتیا ده.

هغه د کډوالو د بهیر د مدیریت په برخه کې د کډوالو چارو وزارت هڅې هم اغېزناکې وبللې.

د نوموړي په وینا، د راستنېدونکو د زیات شمېر او د اړو خلکو اړتیاوو ته په کتو، افغانان لا ډېرو بشري او پراختیايي مرستو ته اړتیا لري او هڅه کوي د نړیوالو لا زیاتې مرستې راجلب کړي.

په ورت وخت کې د ملګرو ملتونو د پراختیايي پروګرام مشر الکساندر ډي کرو ويلي چې په جلال اباد او مزارشریف کې یې د پراختیايي پروژو لیدنه کړې او په افغانستان کې یې اوسنی امنیت او د نشه یي توکو پر وړاندې مبارزه د طالبانو مهمې لاسته راوړنې وبللې.

هغه د افغانانو د اقتصادي ودې لپاره د نړیوالو پر همکارۍ ټینګار وکړ.

بل خوا دطالبانو د کډوالو او راستنېدونکو چارو وزیر عبدالکبیر ویلي چې د ملګرو ملتونو ادارو په سختو شرایطو کې له افغانانو سره مرستې کړې او لا هم ګڼو افغانانو ته خدمات وړاندې کوي.

نوموړي زیاته کړې چې د پرله پسې جګړو او ځینو پېښو له امله میلیونونه افغانان کډوالۍ ته اړ شوي او باید د کډوالۍ اصلي لاملونه له منځه یوړل شي.

په دغه غږیز فایل کې عبدالمتین مبلغ وایي چې په فیض‌اباد کې د طالبانو امنیه قوماندانۍ ته د ورتګ پر مهال، یوه کارکوونکي د هغه د ننوتلو مخه نیولې ده.

هغه د طالبانو له چارواکو غواړي چې دا موضوع اړوندو مسوولینو ته ورسوي او خبرداری ورکوي چې له خلکو سره د ځینو کارکوونکو چلند «د طالبانو د نظام اعتبار ته زیان رسوي».

هغه همدارنګه له مراجعینو سره پر ناسم چلند نیوکه کړې او د طالبانو پر استخباراتو یې غږ کړی چې د کارکوونکو چلند وڅیړي.

مبلغ ټینګار کوي چې «د نظام دروازه باید د خلکو پر مخ خلاصه وي».

سرچینې وایي عبدالمتین مبلغ د دغه غږیز فایل تر خپرېدو وروسته نیول شوی او تر اوسه د هغه د برخلیک په اړه معلومات نشته.

مبلغ په دغه غږیز فایل کې د تېر حکومت پر وړاندې د طالبانو د جګړې دورې او د دغې ډلې د غړو په ملاتړ کې د خلکو رول ته په اشارې سره وایي: «همدغه خلک وو چې موږ ته یې ډوډۍ او چای راکول او موږ یې دغه نظام ته ورسولو.»

طالبانو په تېرو نږدې پنځو کلونو کې په وار وار د خپلو منتقدانو غږونه غلي کړي او ځینې یې نیولي دي.