ټرمپ پر ترکیې د اېف ۳۵ الوتکو د پلورلو په تړاو د پرېکړې خبر ورکړی
د امریکا ولسمشر ډونالډ ټرمپ د سېشنبې په ورځ وویل چې پر ترکیې لګېدلي بندیزونه لرې کوي او پر انقرې د اېف-۳۵ جنګي الوتکو د پلورلو په اړه به پرېکړه وکړي. ټرمپ دا څرګندونې په ترکیه کې د ناټو د سرمشریزې پر مهال له ولسمشر رجب طیب اردوغان سره د لیدنې د پیل پر وخت وکړې.
امریکا په ۲۰۲۰ کال کې پر ترکیه وروسته له هغه بندیزونه ولګول، چې انقرې له روسیې څخه د اېس-۴۰۰ هوايي دفاعي سیستم واخیست. واشنګټن همداراز ترکیه د اېف-۳۵ جنګي الوتکو له پروګرامه وایسته، خو ترکیې دا پرېکړه ناعادلانه او ناقانونه وبلله.
