په بلوچستان کې د امنیتي وضعیت له ترینګلتیا سره هممهاله د پاکستان لومړی وزیر شهباز شریف د دغه ایالت مرکز کوټې ته تللی. د شهباز شریف دفتر ویلي، ټاکل شوې ده چې شریف به د وضعیت ارزولو لپاره د یوې ځانګړې غونډې مشري وکړي.
د پاکستان بلوچستان ایالت په روانه اونۍ کې د یو لړ خونړیو پېښو شاهد و.
د یاد هېواد د پوځ ویاند د چارشنبې په ورځ په یوه خبري ناسته کې وویل، چې په وسله والو بریدونو کې ۴۲ سرتېري او ۵۴ وسله وال وژل شوي دي.
د شریف دفتر اعلان وکړ چې نوموړی به د بلوچستان د امنیتي وضعیت د ارزولو لپاره د یوې لوړپوړې او ځانګړې غونډې مشري وکړي.
د طالبانو د کډوالو او بېرته راستنېدونکو چارو وزارت د پنجشنبې په ورځ (د چنګاښ ۱۸مه) خبر ورکړی، په تېره اونۍ کې ۶۳۸ افغان کډوال چې د پاکستان په زندانونو کې بندیان وو؛ له زندانه تر خوشې کېدو وروسته بېرته افغانستان ته ستانه شوي دي.
د یاد وزارت په خبرپاڼه کې راغلي، چې په خوشې شویو کسانو کې د طب پوهنځي یوشمېر محصلان هم شامل وو. خبرپاڼه زیاتوي، چې دغه کسان په پاکستان کې د اوسېدو د قانوني اسنادو نهلرلو له امله نیول شوي وو او بېلابېلو مودو پورې بندیان وو.
دغه وزارت زیاته کړې، چې له دې ډلې ۵۱۸ کسان د تورخم او ۱۲۰ نور د سپین بولدک له لارې ستانه شوي دي. د یاد وزارت د خبرپاڼې له مخې؛ دغه کسان تر ثبت او د بشري مرستو تر ترلاسه کولو وروسته خپلو سیمو ته ولېږدول شول.
دا په داسې حال کې ده، چې په خیبرپښتونخوا، بلوچستان او سند ایالتونو کې د افغان کډوالو د نیولو لپاره عمليات لاهم دوام لري. د پاکستان حکومت لهخوا افغان کډوالو ته ورکړل شوی ضرب الاجل هم نن پای ته رسېږي او سر له سبا به د دغه هېواد په بېلابېلو برخو کې د بېاسناده افغان کډوالو پرضد د نیولو عملیات پیل شي.
د طالبانو د کډوالو او بېرته راستنېدونکو چارو وزارت وایي، له ۲۰۲۳کال راهیسې څه باندې ۲،۱ مېليونه افغان کډوال افغانستان ته ستانه شوي دي. یوشمېر افغان کډوال بیا نیوکه کوي، چې د بېرته ستنېدو پرمهال له ډېرو ستونزو سره مخ شوي دي.
د پاکستان د پوځ په وینا، په تېرو ۳ ورځو کې په بلوچستان کې په درېیو وسلهوالو بریدونو کې ۴۲ پوځيان او پولیس وژل شوي دي. د پاکستان د جمعیت علمای اسلام دغه وضعیت د واکدارانو غفلت، بېغوري او بېکفایتي پایله بولي او د یوې لویې غمیزې د رامنځته کېدو په تړاو یې اندېښنه څرګنده کړې ده.
د جمعیت علمای اسلام ګوند په بلوچستان کې د امنیت پر وړاندې اوسنی «ګډوډ حالت» د اندېښنې وړ او د خلکو د ژوند او مال ساتنه یو بنسټیز حق بللی دی او په وینا یې، د نا امنیو دغې څپې ته په جدي توګه پام نهکول او په دولتي کچه د اغېزناکو ګامونو نشتوالی «د لازیاتې اندېښنې لامل دی».
د دغه ګوند ویاند اسلم غوري د چهارشنبې په ورځ (د چنګاښ ۱۷مه) د یوې اعلامیې په خپرولو سره زیاته کړې: «د واکدارانو غفلت، بېتفاوتي او بېکفایتي د یوې لویې غمیزې د رامنځته کېدو بوی ورکوي. ترکیبي نظام په تدریجي ډول خپل منطقي پای ته نږدې کېږي».
غوري څرګنده کړې: «د خلکو د هیلو خلاف، تحمیل شوي حکومتونه د دې وړتیا نهلري چې خلکو ته امن او امان برابر کړي».
نوموړي په بلوچستان کې د ناامنیو روان وضعیت د بېبرخې توبونو پایله بللې او په ډاګه یې ویلي: «د خلکو بېبرخې توب او د سرچینو غیرعادلانه وېش د ناامنیو بنسټیز لاملونه دي».
دغه ګوند وړاندیز کړی، چې چارواکي باید په بېړني ډول سره کېني او د بلوچستان، خیبر پښتونخوا او کشمیر د وضعیت په اړه د اجماع پر بنسټ یوه کړنلاره جوړه کړي.
په بلوچستان کې د روانې اونۍ په بریدونو کې ۴۲پاکستاني سرتېري وژل شوي | افغانستان انټرنشنل پښتو
د پاکستان پوځ د چهارشنبې په ورځ وویل، چې په بلوچستان ایالت کې د جولای له شپږمې راهیسې په درېیو وسلهوالو بریدونو کې ۴۲ پوځيان او پولیس او همداراز ۵۴ وسلهوال وژل شوي دي.
د طلبانو د اطلاعاتو او کلتور وزارت د خپرونو چارو مرستیال حیاتالله مهاجر فراهي په پنجشېر کې د خبریالانو د فکري روزنې لپاره په جوړ شوي سیمینار کې وویل، دوی د هېواد په تاریخ کې د لومړي ځل لپاره په پاکستان کې د «شر او فساد» مرکزونه په نښه کړي دي.
د پنجشنېر لپاره د طالبانو د رسنیو دفتر د چهارشنبې په ورځ (د چنګاښ ۱۷مه) د یوې خبرپاڼې په خپرولو سره ویلي، حیاتالله مهاجر فراهي په ننني سیمینار کې د پاکستان نظام ته د «رژيم» په خطاب کولو سره وویل، دغه «رژيم» څو ځلي د افغانستان هوايي حریم نقض کړی، خو په وینا یې، دوی هم په مناسب وخت کې د پاکستان یادو اقداماتو ته ځواب ورکړی دی.
هغه څرګنده کړه، چې د هېواد په تاریخ کې د لومړي ځل لپاره له افغان خاورې په پاکستان کې د «شر او فساد» مرکزونه په نښه شوي او زیاته یې کړه: «په پاکستان او په ځانګړې توګه په اسلاماباد، پېښور او بلوچستان کې د شر او فساد د مرکزونو پر وړاندې ترسره شوي عملیات د هېواد په تاریخ کې بېساري او د لومړي ځل لپاره ترسره شوي دي. دغه ډول اقدامات د هېواد د دفاعي ځواک د پیاوړتیا ښکارندويي کوي».
فراهي همداراز په اوسني عصر کې د رسنیو پر اهمیت له ټينګار سربېره له خبریالانو وغوښتل، چې د «منفي تبلیغاتو او شایعاتو» پر وړاندې ودرېږي او د ملي یووالي او «اسلامي نظام» د تقویت په برخو کې خپل اغېزناک نقش ترسره کړي.
د یادونې وړ ده، چې له ۲۰۲۲ کال راهيسې پاکستان پر افغانستان ۱۰ لوی بریدونه کړي او د طالبانو په وینا، د یادو بریدونو له امله سلګونه بېګناه افغانانو ته مرګژوبله اوښتې او په ځواب کې یې طالبانو هم په بېپیلوټه الوتکو سره په خیبر پښتونخوا، اسلاماباد او بلوچستان کې یو شمېر هدفونه په نښه کړي دي.
د افغانستان د مخکیني جمهوري نظام لومړي مرستیال امرالله صالح د پاکستان د پوځ د عامه اړیکو د دفتر (ایایسپیار) د وروستیو څرګندونو په غبرګون کې ویلي، چې پاکستان له ۳۰ کلونو وروسته بالاخره پر دې اعتراف وکړ چې طالبان مشروعیت نه لري.
ښاغلي صالح د پاکستان پر دغه نوي دریځ ملنډې وهلې او ویلي یې دي چې د دې حقیقت په درک کولو کې دغه هېواد درې لسیزې وخت تېر کړ.
امرالله صالح پر ایکس خواله رسنۍ کې لیکلي، چې د بلوچستان په زیارت سیمه کې تر برید وروسته د پاکستاني پوځ د ویاند خبري غونډه یې لیدلې ده. هغه زیاته کړې چې د پاکستان پوځ په لومړي ځل داسې څه کشف کړي چې دی یې ورته حیران کړی دی او هغه د طالبانو نامشروع بلل دي. د صالح په وینا، د پاکستان د پوځ ویاند په خپلو خبرو کې مسلکي اصطلاحات کارولي او ویلي یې دي چې په پاکستان کې بریدونه روښانه همغږي، قومانده، کنټرول، لوژستیک او تبلیغاتي بستر لري.
د افغانستان دغه مخکیني چارواکي وړاندیز کړی چې پاکستان باید اوس په خپل منځ کې یو جدي چاڼ پیل کړي او د خپلې استخباراتي ادارې (ایایسای) هغه ښوونکي وپېژني چې طالبانو ته یې تر اړتیا ډېر مهارتونه او پوهه ور زده کړې ده. هغه په طنزیه ډول لیکلي چې دا ډېره دردوونکې ده کله چې د یو چا خپل نیابتي ځواک نامشروع شي او د خپل بادار پر وړاندې سرکښه شي. ښاغلي صالح ټینګار کړی چې دی له ۳۰ کلونو راهیسې طالبان د پاکستان د پوځ د مرکزي دفتر (جيایچکیو) نامشروع نیابتي ډله بولي.
ښاغلي صالح د خپلو څرګندونو په دوام کې د کندهار د والي یادونه کړې چې په خپل زغرهوال موټر کې په پرله پسې ډول کوېټې ته سفر کوي ترڅو هلته له خپلې کورنۍ سره وخت تېر کړي. نوموړي پوښتنه کړې چې ایا د کندهار والي هم د همدې نامشروع ډلې برخه دی که نه؟ صالح د پاکستان د پوځ له عامه اړیکو دفتر څخه غوښتي چې د افغان ولس لپاره د طالبانو د تاریخ او د هغوی د پاکستاني ریښو په اړه معلومات ورکړي او د طالبانو بنسټګر نصیرالله بابر ته یې د عذاب غوښتنه کړې ده.
دا په داسې حال کې ده چې د پاکستان د پوځ ویاند احمد شریف چودري په بلوچستان کې په تېرو څلورو ورځو کې د دغه هېواد د ۴۲ امنیتي سرتېرو او ۵۴ وسلهوالو د وژل کېدو خبر ورکړی دی. چودري افغان طالبان تورن کړي چې د پاکستان مخالفو وسلهوالو ډلو ته یې پناهځایونه او مالي اسانتیاوې برابرې کړې دي او له هغوی څخه ملاتړ کوي، خو طالبانو تل دغه ډول تورونه رد کړي دي.
د افغانستان د تېر جمهوري نظام پر مهال د چارو د ادارې مشر فضل محمود فضلي د پاکستان پر پوځ سختې نیوکې کړې دي او دغه هېواد یې د خپل ولس د تېر ایستلو او د جګړې د دوام لپاره د فرضي دښمنانو په جوړولو تورن کړی دی.
ښاغلي فضلي پر ایکس خواله رسنۍ کې لیکلي چې د پاکستان د پوځ د عامه اړیکو دفتر دوه فرضي دښمنان د «فتنه الخوارج» او «فتنه هندوستان» په نومونو جوړ کړي دي او خپل ولس ته یې د داسې ګواښونو په توګه وړاندې کوي چې ګواکې د دوی د بقا لپاره لوی خطرونه دي.
د چارو د ادارې دغه پخواني چارواکي زیاته کړې چې اسلاماباد غواړي د دغو ناڅرګندو او فرضي جوړښتونو په وړاندې د جګړې له لارې په سیمه کې د وېرې او ناامني فضا جوړه کړي. د هغه په وینا، دا هڅې د ډیورنډ کرښې په اوږدو کې د بې ثباتۍ د رامنځته کولو لپاره کیږي.
فضل محمود فضلي ټینګار کړی چې پاکستان د دغو جوړو شویو دښمنانو په مرسته هڅه کوي چې خپلې بې پایه امنیتي مبارزې توجیه کړي او د وېرې او بې ثباتۍ خپرولو له لارې د عامه افکارو ذهنیتونه کنټرول کړي. پاکستان د ټيټيپي او بلوڅ بېلتون پالو وسلهوالو ډلو لپاره دغه فرضي نومونه کاروي.
دا په داسې حال کې ده چې د پاکستان او طالبانو ترمنځ په دې وروستیو کې کړکېچ زیات شوی دی. د پاکستان د پوځ ویاند احمد شریف چودري په بلوچستان کې په وروستیو نښتو کې د ۴۲ امنیتي ځواکونو او ۵۴ وسله والو د وژل کېدو خبر ورکړی او ادعا یې کړې ده چې افغان طالبان د پاکستان د مخالفو وسله والو ډلو مالي ملاتړ کوي او پناه ځایونه یې ورکړي دي.