د حمید حسن تر روزنې لاندې د امو نهنګانو لوبډلې د درېیم ځل لپاره د افغانستان د کرېکټ شپږېزې لیګ ۱۱م پړاو سیالیو اتلولي خپله کړه. د امو نهنګانو لوبډلې په پایلوبه کې سپین غر پړانګانو ته د ۷ وېکټو په توپير ماتې ورکړه او د یادو سیالیو اتله شوه.
د پایلوبې پچه سپین غړ پړانګانو لوبډلې وګټله او لومړی یې د توپ وهنې پرېکړه وکړه. سپين غر پړانګانو لوبډلې د خپلو ټولو لوبغاړو په سوځېدو ۱۶۷ منډې هدف وټاکه. په سپين غر پړانګانو لوبډله کې عصمت عالم ۶۷ او راشدخان ۲۷ تر نورو لوبغاړو زیاتې منډې وکړې.
د امو نهنګانو په لوبډله کې فضل الحق فاروقي، ګلبدین نایب، عبدالله احمدزي او قیس احمد دوه دوه لوبغاړي وسوځول. د امو نهنګانو لوبډلې د خپلو درېیو لوبغاړو په سوځېدو په ۱۶.۱ اور کې دغه هدف پوره کړ.
د یادې لوبډلې لپاره عمران میر ۷۷ او حسن عیسی خېل ۶۳ منډې جوړې کړې او لوبډله یې تر بریا ورسوله. د افغانستان کرېکټ بورډ ویلي، چې د امو نهنګانو لوبډلې د شپږېزې کرېکټ د ۹م او ۱۰م پړاو سیالیو اتلولي هم په خپل نوم کړې وه.
دغه سیالۍ په خوست ولایت کې ترسره شوې، چې پرمهال یې زرګونه نندارچیان لیدو ته راغلي وو. کرېکټ بورډ یادې سیالۍ د ځوان لوبغاړو د ځلېدو او ملي لوبډلې ته د لار موندنې لپاره مهمې ګڼلې او هیله یې ښودلې، چې افغان کرېکټ ملي لوبډله به په راتلونکي کې لا غوره لوبغاړي ولري.
