هغه د دواړو هېوادونو د اوږدې ګډې پولې او په ایران کې د میلیونونو افغان کډوالو شتون ته په اشارې وویل، چې د افغانستان وضعیت په مستقیم او عاجل ډول پر ایران اغېز لري.
ایرواني له طالبانو سره معنادار او عملي تعامل «یوازې یو انتخاب نه، بلکې یو ستراتیژیک ضرورت وباله، څو خطرونه مدیریت، لګښتونه کم او د راتلونکي احتمالي چلنجونو مخه ونیول شي.»
هغه په ورته وخت کې د بشري حقونو په ځانګړي ډول د افغانستان د ښځو او نجونو د حقونو په اړه جدي اندېښنه څرګنده کړه او ویې ویل: «د ښځو او نجونو حالت لا هم د ژورې اندېښنې وړ دی. د ښځو او نجونو پر زدهکړو، کار او ټولنیز ګډون منظم لګېدلي محدودیتونه د اسلام له اصولو او د بشري کرامت له ارزښتونو سره په ټکر کې دي.»
د ایران استازي له طالبانو وغوښتل، چې دا محدودیتونه ژر تر ژره لرې کړي.
نوموړي د ملګرو ملتونو د څار د راپور یادونه وکړه او زیاته یې کړه، چې دا مهال ترهګرې ډلې، سازمانونه، بهرني وسلهوال، القاعده او داعش په افغانستان کې د خپلو غړو پر زیاتولو بوخت دي او په دغه هېواد کې دیني مدرسو دغه وضعیت لا بحراني کړی دی.
نوموړي له نړۍوالې ټولنې، ملګرو ملتونو، امنیت شورا او نورو بنسټونو څخه د افغانستان د حل په برخه کې وغوښتل، چې پر طالبانو فشارونه زیات کړي، ترڅو دغه ډله پر کړو ژمنو عمل وکړي.
د هغه په خبره، طالبانو د ټولګډونه حکومت د جوړېدو، له سیاسي مخالفینو سره د خبرو د پيل، له ترهګرۍ سره د مبارزې او ورته نورو برخو کې خپلې ژمنې نه دي عملي کړي.
فایق همداراز زیاته کړې: «یوازې بشري مرستې د افغانانو ستونزې نهشي حل کولی؛ اړتیا ده چې یو ټولګډونه، ځواب ورکوونکی، بامسوولیت، د خلکو په خوښه، پر خپلو پښو ولاړ، ملي او نړۍوالو اصولو ته ژمن حکومت جوړ شي.»
فایق په افغانستان کې د یوناما له ادارې هم وغوښتل، چې طالبان سیاسي خبرو کولو ته حاضر کړي.
نوموړي یو ځل بیا ټينګار وکړ، چې نړۍ دې د افغانانو په خاص ډول ښځو، نجونو او ماشومانو ترڅنګ ودرېږي او غږ ته دې مثبت ځواب ووايي.
فایق د پاکستان او ایران څخه په زور اېستل شویو کډوالو موضوع ته په اشارې وویل: «په ۲۰۲۵ کال کې له پاکستان او ایران څخه تر دوه میلیونه زیات افغان کډوال په زور اېستل شوي، چې ډېری یې ښځې او ماشومان دي.»
نوموړي زیاته کړې، چې دغه کډوال د طالبانو تر واک لاندې هغو سیمو ته لېږدول شوي، چې ناامنه، بېسرپنا او ان د لومړنیو خدماتو څخه هم بېبرخې دي.
هغه د انساني مرستو د کمېدو یادونه وکړه او له نړۍ څخه یې د بشري مرستو پر زیاتېدو ټینګار وکړ.
نصیر احمد فایق له پاکستان او ایران څخه وغوښتل، چې د کډوالو سره د انساني او بشري کرامت له مخې چلند وکړي.
ملګرو ملتونو کې د هند استازی: موږ په افغانستان کې د تلپاتې ثبات زمینه برابره کړې ده
د ملګرو ملتونو په ناسته کې د هند استازي وویل، چې هند له کلونو راهیسې په افغانستان کې د سولې او ثبات غږ پورته کړی او تل یې هڅه کړې، چې له افغانانو سره په همکارۍ د دوامدار ثبات زمینه برابره کړي.
د هند د استازي په وینا، هېواد یې د افغانستان په تړاو په مهمو نړۍوالو فورمونو لکه د دوحې په پروسه او نورو ډېپلوماټیکو فارمټونو کې فعاله ونډه لرلې ده. هغه ټینګار وکړ، چې دا مشارکت باید دوام ومومي، څو د سولې او ثبات ترویج قوي شي.
د پاکستان استازی: د افغانستان له خاورې ترهګري د پاکستان د ملي امنیت لپاره لوی ګواښ دی
په ملګرو ملتونو کې د پاکستان استازي د افغانستان په اړه د ملګرو ملتونو د امنیت شورا په غونډه کې یوځل بیا وویل، چې افغانستان د ترهګرو په امن ځای بدل شوی او د افغانستان له خاورې فعالیت کوونکي ترهګر د پاکستان د ملي امنیت لپاره لوی ګواښ دی.
نوموړي ویلي، چې داعش، القاعده، ټيټي پي، پي ټي ای این او بلوڅ وسله والي ډلې په افغانستان کې امن ځایونه او لسګونه ترهګریز کمپونه لري او یادې ډلې د پاکستان پر ضد فعالیت کوي.
