ملاله یوسفزۍ: د ولسي محکمې پرېکړه روښانه ده چې طالبان د جنسیتي اپارتاید نظام چلوي
د سولې نوبل جایزې ګټونکې او د نجونو د زده کړو مبارزه ملاله یوسفزۍ وایي، د افغانستان د ولسي محکمې وروستۍ پرېکړه ښکاره ده چې طالبانو په افغانستان کې د جنسیتي اپارتاید یو منظم او ظالمانه نظام جوړ کړی دی. نوموړې وايي، دا نظام باید په نړیواله کچه په همدې رسمي نوم وپېژندل شي.
ملاله یوسفزۍ زیاتوي چې افغان ښځې او نجونې له څو کلونو راهیسې دا حقیقت نړۍ ته بیانوي، خو نړیوالې ټولنې داسې شرایط برابر کړل چې طالبان یو ځل بیا واک ته ورسېدل او خپل ظلمونه یې پر ښځو وتپل.
نوموړې پر حکومتونو غږ کړی چې نور عملي ګامونه پورته کړي او په رسمي توګه جنسیتي اپارتاید د بشریت ضد جرم په توګه وپېژني او طالبان د خپلو کړنو پر وړاندې ځوابویونکي کړي.
ملاله وایي: «هر ځل چې له افغان نجونو سره خبرې کوم، دوی همغه هیلې او خوبونه لري چې ما د دوی په عمر کې لرلې. دوی د احترام، عزت او روښانه راتلونکي حق لري.»
هغې ټینګار وکړ چې د حقونو تر ترلاسه کولو به د افغان نجونو ترڅنګ ولاړه وي.
