د بدخشان د یفتل ولسوالۍ سقوط

د جمهوري نظام پر مهال پخواني لوی څارنوال فرید حمیدي د بدخشان د یفتل پایین ولسوالۍ لنډ مهالي سقوط ته په اشارې سره ویلي، چې دغې پېښې د طالبانو د سراسري حاکمیت ادعا او د هغوی د «نه ماتېدونکې افسانه» له منځه یووړه.

محمد فرید حمیدي د جمعې په ورځ (د چنګاښ ۲۶مه) په خپله اېکس‌پاڼه ویلي، طالبان چې د دوحې د «ننګین» تړون له لارې واک ته رسېدلي او مشروعیت نه‌لري، د دغې ولسوالۍ په سقوط سره یې د واکمنۍ «طلسم» مات شو.

فرید حمیدي په خپل غبرګون کې د یفتل پایین له سقوط څخه د درېیو درسونو یادونه کړې او ویلي یې دي، لومړی درس دا دی چې حق تلفي، سیاسي او قومي انحصار، تبعیض، استبداد او پر زور تکیه کول هېڅکله دوام نه‌شي موندلی. د هغه په وینا، د هېواد د ستونزو د حل لاره یوازې په تفاهم، د یو بل په منلو، ټولنیز عدالت، د تبعیض په له‌منځه وړلو او د ټولو ښځو او نارینه‌وو د حقونو، عزت او کرامت په خوندیتوب کې ده.

حمیدي د دویم درس په توګه د مبارزې پر قانونمندۍ ټینګار کړی او ویلي یې دي، چې په تېرو پنځو لسیزو کې ټولو خواوو پر ملکي تلفاتو او د ښوونځیو، کلینیکونو او پلونو په څېر د عامه تاسیساتو پر ویجاړولو تمرکز درلود. خو د هغه په وینا، په یفتل پایین کې بریدګرو ځواکونو د پراخو ورانیو د رامنځته کولو له وړتیاوو سره سره، یوازې پر پوځي اهدافو تمرکز وکړ او ارزښتونو ته یې درناوی وکړ.

د افغانستان دغه پخواني لوړپوړي چارواکي زیاته کړې، چې واکمنه ډله نه‌شي کولای خپلې ظالمانه، نامشروع او تبعیضي واکمنۍ ته دوام ورکړي. هغه د یوه داسې ازاد افغانستان غوښتنه وکړه، چې ټول وګړي یې پرته له تبعیضه سره برابر وي او ښځې او نارینه په‌کې د خپلو حقونو، ازادۍ او کرامت خاوندان وي.

دا غبرګون داسې مهال څرګندېږي، چې د راپورونو له مخې، د «سپاهیان میهن» په نوم یوې نوې تاسیس شوې وسله‌والې ډلې د جمعې ورځې په سهار وختي په بدخشان کې پر یفتل پایین ولسوالۍ برید وکړ او د څو ساعتونو لپاره یې د دغې ولسوالۍ د ودانۍ، امنیه قوماندانۍ او استخباراتو کنټرول په لاس کې واخیست. طالبانو هم تایید کړې، چې د یفتل پایین ولسوالۍ د لنډ وخت لپاره د دوی له کنټروله وتلې وه، خو ادعا یې کړې، چې د تازه ځواکونو په رسېدو سره بریدګر له سیمې تښتېدلي دي.

په تاجکستان کې د افغانستان سفیر محمد ظاهر اغبر د بدخشان په یفتل ولسوالۍ کې د طالبانو پر وړاندې د «سپاهیان میهن» وسله‌والې ډلې وروستی برید «زړورتیا» بللې ده. هغه ویلي: «د یفتل له سقوط سره ښکاره شوه چې طالبان کاغذي پړانګان دي».

ظاهر اغبر د جمعې په ورځ (د چنګاښ ۲۶مه) په خپله بیانیه کې د هغو کسانو ستاینه کړې، چې د ده په وینا، د طالبانو حقیقي څېره یې ښکاره کړې او ثابته یې کړه، چې دغه ډله یو «کاغذي پړانګ» دی. هغه د دغو وسله‌والو مبارزه وستایله او زیاته یې کړه، چې په تیاره کې د یوې شمعې بلېدل هم د رڼا لپاره کافي دي.

د افغانستان دغه ډیپلوماټ ټینګار کړی، چې د بدخشان د یفتل پېښه به په دغه ولایت او ټول افغانستان کې د یوه نوي بهیر پیل وي. د هغه په وینا، د طالبانو د ظلمونو پر وړاندې د مخالفانو درېدل ښيي، چې د خلکو د زغم کاسه ډکه شوې او نور د هغوی د واکمنۍ منلو ته چمتو نه‌دي.

محمد ظاهر اغبر چې په تاجکستان کې د افغانستان د سفارت چارې پر غاړه لري، تل یې پر افغانستان د طالبانو د واکمنۍ پر وړاندې سخت دریځ لرلی دی. هغه په خپلو څرګندونو کې یو ځل بیا پر افغانانو غږ کړی، چې د خپل هېواد د ازادۍ او د طالبانو د ادارې د پای ته رسولو لپاره مبارزې ته دوام ورکړي.

دا غبرګونونه په داسې حال کې څرګندېږي، چې د «سپاهیان میهن» په نوم یوې نوې تاسیس شوې وسله‌والې ډلې نن سهار وختي د بدخشان پر یفتل پایین ولسوالۍ برید وکړ او د څو ساعتونو لپاره یې د دغې ولسوالۍ کنټرول ترلاسه کړ. طالبانو د دغې ولسوالۍ د سقوط تاییدولو ترڅنګ خپل د پوځ لوی درستیز فصیح‌الدین فطرت د دغې جبهې د مهارولو لپاره سیمې ته واستاوه او په تړاو یې یو شمېر سیمه‌ییز کسان او خپل ځواکونه یې هم نیولي دي.

د تېر جمهوري نظام د ولسي جرګې پخوانۍ غړې فوزیه کوفي وایي، طالبانو د بدخشان د یفتل ولسوالۍ له سقوط وروسته، د ماشومانو په ګډون د سیمې د ملکي وګړو په نیولو پیل کړی دی. د هغې په وینا، دغه نیونې نن سهار د یادې ولسوالۍ له سقوط سره په تړاو شوې دي.

فوزیې کوفي د جمعې په ورځ (د چنګاښ ۲۶مه) په خپله اېکس‌پاڼه لیکلي، چې طالبان دغه بې‌ګناه ملکیان په دې تور نیسي چې ګواکې دوی د یفتل ولسوالۍ په سقوط کې لاس درلود. هغې زیاته کړې، چې د فشار په توګه د عامو خلکو نیول او د «ځپلو تګلاره» تل برعکس پایله ورکوي.

د ولسي جرګې دغې پخوانۍ غړې ټینګار کړی، چې طالبان څومره چې خلک زیات وځپي، په هماغه اندازه به د ازادۍ او د خپل برخلیک ټاکلو لپاره د ولس هوډ او اراده نوره هم پیاوړې شي.

بل لور ته، په بدخشان کې د طالبانو امنیه قوماندانۍ هم تایید کړې، چې د یفتل ولسوالۍ پر مرکز له برید وروسته یې یو شمېر کسان نیولي دي. طالبانو ویلي، چې دغه کسان د پېښې په تړاو تر پوښتنو ګروېږنو لاندې دي.

دا نیونې وروسته له هغې کېږي، چې د «سپاهیان میهن» په نوم یوې نوې جوړې شوې وسله والې ډلې نن سهار وختي د بدخشان پر یفتل پایین ولسوالۍ برید وکړ او د څو ساعتونو لپاره یې د هغې کنټرول ترلاسه کړ. دا په تېرو پنځو کلونو کې لومړی ځل دی، چې په بدخشان کې یوه ولسوالي د طالبانو له ولکې وځي او مخالف ځواکونه په‌کې د طالبانو ځواکونه بې‌وسلې کوي او خپل بیرغ پورته کوي.

په بدخشان کې د یوې نوې جوړې شوې ډلې له برید وروسته، د طالبانو ادارې د خپل پوځ لوی درستیز فصیح‌الدین فطرت د «سپاهیان میهن» د مهارولو لپاره بدخشان ته استولی.

فطرت د جمعې په سهار د وسله‌والو بریدګرو پر وړاندې د عملیاتو قومانده پر غاړه اخیستې.

فطرت ادعا وکړه چې د بریدګرو بریدونه شنډ شوي او هغوی خپلو موخو ته نه دي رسېدلي.

د طالبانو د پوځ لوی درستیز د جمعې په ورځ په بدخشان کې اعلان وکړ چې دوی نن سهار د یفتل پایین ولسوالۍ پر ودانۍ د وسله‌والو بریدګرو د برید له پلان څخه خبر شوي وو.

هغه په دې اړه وویل: «موږ سهار وختي خبر شوو چې دښمن پلان لري په یفتل پایین کې بلوا وکړي.»

فطرت زیاته کړه چې د دغو معلوماتو له ترلاسه کولو وروسته، پخپله له کابل څخه بدخشان ته تللی او د طالبانو ځواکونو ته یې د اقدام امر کړی دی.

د هغه په وینا، طالبانو وکولای شول دا پلان شنډ کړي او موخو ته د بریدګرو د رسېدو مخه ونیسي.

د طالبانو د پوځ لوی درستیز بریدګر «مفسدین» او «اغتشاشګر» وبلل او د هغوی د «اکثریت» د نیولو ادعا یې وکړه او ویې ویل چې پاتې کسان هم تر تعقیب لاندې دي.

فطرت همدارنګه ټینګار وکړ چې د بدخشان امنیتي وضعیت د طالبانو تر کنټرول لاندې دی او دغه ډله به د وسله‌والو مخالفانو له هر ډول اقدام سره مقابله وکړي.

دا څرګندونې په داسې حال کې مطرح کېږي چې نوې جوړې شوې جبهې «سپاهیان میهن» پر یفتل پایین ولسوالۍ د جمعې د سهار د برید مسوولیت په غاړه اخیستی او ادعا یې کړې ده چې ځواکونو یې د څو ساعتونو لپاره د دغې ولسوالۍ د ودانۍ کنټرول په لاس کې درلود.

دطالبانو د بدخشان ولایت دامنیه قوماندانۍ ویاند احسان الله کامګار ویلي چې د کوز یفتل ولسوالۍ پر ودانۍ د تېرې شپې د برید په تړاو اووه بریدګر یې له وسلو سره نیولي دي.

د نوموړي په وینا، امنیتي ځواکونو برید شنډ کړی او د نورو شکمنو کسانو د نیولو هڅې روانې دي.

د بدخشان ولایت د طالبانو د امنیه قوماندانۍ ویاند کامګار ویلي چې د برید پر مهال ډېری امنیتي منسوبین په رخصتۍ وو او د هغه په وینا، یو شمېر «غیرمسوولو او مغرضو کسانو» له همدې وضعیت څخه په ګټې اخیستنې د شپې له خوا د کوز یفتل ولسوالۍ پر ودانۍ برید کړی.

د نوموړي په وینا، د طالبانو امنیتي ځواکونو د برید هڅه شنډه کړه او اووه تنه یې له وسلو سره نیولي.

کامګار زیاته کړې چې په پېښه کې د نورو ښکېلو کسانو د موندلو او نیولو لپاره هڅې روانې دي.

د سپاهیان میهن په نوم نوې جوړې شوې وسله والې ډلې چې دبدخشان دپخوانيو پوځیانو څخه جوړه شوې، نن سهار وختي د بدخشان کوز یفتل ولسوالۍ د نیولو خبر ورکړی و.

سپاهیان میهن جبهې په رسمي ډول د بدخشان ولایت پر یفتل پایین ولسوالۍ د جمعې ورځې د سهار وختي برید مسوولیت پر غاړه واخیست او ادعا یې وکړه چې دا ولسوالي یې د طالبانو له کنټروله بهر کړې وه.

په ورته وخت کې، په بدخشان کې د طالبانو د پولیسو ویاند برید تایید کړی.

سپاهیان میهن جبهې په یوه مطبوعاتي اعلامیه کې وویل چې د دې جبهې ځواکونو د بدخشان په کشم، یاوان-راغ او یفتل پایین ولسوالیو کې «تعرضي، همغږي او ځپونکي» عملیات کړي دي.

دې جبهې ادعا کړې ده چې د دغو عملیاتو په پایله کې، یفتل پایین ولسوالي «په بشپړ ډول د طالبانو له تصرفه وتلې او ازاده شوې ده».

همدارنګه یې ادعا کړې چې یو شمېر طالب ځواکونه اسیران شوي او د هغوی وسلې، مهمات او پوځي تجهیزات د دې جبهې د ځواکونو لاس ته ورغلي دي.

سپاهیان میهن په دې اعلامیه کې ځان د «ټولنې د اساسي اړتیاوو» زیږنده بللی او ویلي یې دي چې د دې جریان هدف، د «ازادۍ، عدالت، برابرۍ او د انساني کرامت د ساتنې» لپاره مبارزه ده.

دې جبهې په خپله اعلامیه کې د افغانستان له خلکو، ښځو او نارینه‌وو او د طالبانو له نورو مخالفو جریانونو غوښتي چې د دې ډلې ترڅنګ ودرېږي.

په ورته وخت کې، په بدخشان کې د طالبانو د پولیسو ویاند احسان‌الله کامګار پر یفتل پایین ولسوالۍ د خپلو وسله‌والو مخالفانو برید تایید کړی دی.

هغه وویل چې دا برید هغه مهال وشو چې د ولسوالۍ لومړۍ درجې مسوولین په رخصتۍ کې وو.

کامګار ادعا وکړه چې د طالبانو د ځواکونو له رسېدو وروسته، بریدګر پر شا تمبول شوي او یو شمېر یې نیول شوي دي. هغه د نیول شویو کسانو د شمېر او د دواړو لورو د مرګ‌ژوبلې په اړه جزییات وړاندې نه کړل.

سیمه ییزو سرچینو تر دې وړاندې افغانستان انټرنشنل ته ویلي وو چې شاوخوا ۲۰ تر ۲۵ پورې وسله والو کسانو د جمعې په سهار د یفتل پایین ولسوالۍ پر ودانۍ برید وکړ، د څو ساعتونو لپاره یې د هغې کنټرول په لاس کې واخیست، خپل بیرغ یې پورته کړ او د ځینو وسلو، پوځي تجهیزاتو او دولتي وسایطو له لېږدولو وروسته یې سیمه پرېښوده.

له دې برید وروسته طالبانو له فیض اباد ښار څخه یفتل پایین ته مرستندویه ځواکونه لېږلي او د کور په کور تالاشۍ عملیات یې پیل کړي دي.

سیمه ییزې سرچینې وایي چې د دغو عملیاتو په جریان کې، یو شمېر ځايي اوسېدونکي او حتا د طالبانو ځینې سیمه ییز جنګیالي هم نیول شوي دي.

د طالبانو د لوی درستیز په ګډون د طالبانو یو شمېر لوړپوړي چارواکي له کابل څخه بدخشان ته تللي څو د دغه ولایت امنیتي وضعیت وڅېړي.

د طالبانو د بدخشان امنیه قوماندانۍ اعلان کړی چې په یفتل پایان ولسوالۍ کې د وسله‌والو ډله‌ییز برید د دوی د امنیتي ځواکونو په رسېدو سره مهار شوی او یو شمېر بریدګر نیول شوي.

دوی زیاتوي، چې دغه برید د جمعې په شپه داسې مهال وشو چې د یفتل ولسوالۍ لومړۍ درجه مسوولان په رخصتۍ تللي وو.

د بدخشان د امنیه قوماندانۍ ویاند احسان‌الله کامګار په وینا، بریدګرو چې په رسنیو کې یې ځانونه د «سپاهیان میهن» په نامه معرفي کړي، د ولسوالۍ پر مقر برید وکړ خو ددوی د امنیتي ځواکونو له غبرګون سره مخ شول.

نوموړي زیاته کړې چې ددوی امنیتي ځواکونو د برید د راپور له ترلاسه کولو وروسته په څو ساعتونو کې ځانونه سیمې ته ورسول، برید یې په شا وتمباوه او بریدګر یې له سیمې تېښتې ته اړ اېستل.

د طالبانو د بدخشان د امنیتي چارواکو په وینا، په دې نښته کې یو شمېر بریدګر ژوندي نیول شوي او د پاتې نورو د نیولو هڅې روانې دي، خو په دې اړه یې نور جزئیات نه دي ور کړي.

احسان‌الله کامګار ویلي، چې د پېښې په اړه څېړنې روانې دي او بشپړ جزییات به وروسته له رسنیو سره شریک کړل شي.

د «سپاهیان میهن» په نامه دغې نوې جوړې شوې مخالفې وسله والې ډلې د یوې اعلامیې په خپرولو سره ویلي، چې په دغه ناڅاپي برید سره یې د څو ساعتونو لپاره د ولسوالۍ د ودانۍ، امنیه قوماندانۍ او استخباراتو کنټرول ترلاسه کړی و.

دوی ادعا کړې چې د طالبانو ځواکونه یې بې وسلې کړي وو او خپل بیرغ یې پرې هسک کړی و.

دا لومړی ځل دی چې پر افغانستان د طالبانو د بیا واکمنۍ په درشل کې یوه مخالفه ډله په بدخشان کې د یوې ولسوالۍ مرکز په موقتي توګه د طالبانو له کنټروله وباسي او د دغه برید په کولو سره خپل حضور اعلانوي.

د سپاهیان میهن په نوم نوې جوړې شوې وسله والې ډلې د بدخشان پر یفتل پایین ولسوالۍ ناڅاپې برید وکړ او د یادې ولسوالۍ کنټرول یې د لنډ مهال لپاره په لاس کې واخیست.

ځايي سرچینو افغانستان انټرنشنل ته ویلي، په سپاهیان میهن کې د بدخشان پخواني پوځیان او د نورو قشرونو غړي راټول دي.

یفتل پایین د بدخشان لومړنۍ ولسوالي ده چې د طالبانو د واکمنۍ د پنځم کال په درشل کې د لنډ وخت لپاره د دوی له کنټروله ووته.

سپاهیان میهن په همدې برید سره د لومړي ځل لپاره خپل موجودیت اعلان کړ.

سپاهیان میهن څوک دي او مشري یې څوک کوي؟

د سپاهیان میهن په اړه لا هم ډېر معلومات نه دي خپاره شوي. ځايي سرچینو افغانستان انټرنشنل ته ویلي، سپاهیان میهن د بدخشان د بېلابېلو ټولنیزو قشرونو او اوسېدونکو له لوري جوړه شوې ډله ده چې په دې ولایت کې د طالبانو له ادارې څخه د خلکو د زیاتېدونکې نارضایتۍ په غبرګون کې رامنځته شوې ده.

د سرچینو په وینا، د دې ډلې په غړو کې مدني فعالان، ځینې پخواني پوځي کسان او ځايي اوسېدونکي شامل دي. ویل کېږي، دوی د پخوانیو مجاهدینو له یو شمېر قوماندانانو او ځینو سیاسي جریانونو سره اړیکې او همغږي لري، خو له هېڅ یوه جریان سره تشکیلاتي تړاو نه لري او ځان یوه خپلواکه ډله معرفي کوي.

د دې ډلې یوه غړي افغانستان انټرنشنل ته ویلي، د سپاهیان میهن د جوړېدو اصلي انګېزه «په بدخشان کې د طالبانو ظلم او ځپنه» ده. هغه زیاته کړې: «نور مو نه شوای زغملای چې طالبان دې د بدخشان پر خلکو خپل ظلم ته دوام ورکړي. زموږ موخه دا ده چې د سیمې خلک د طالبانو پر وړاندې د درېدو لپاره راټول کړو».

تر اوسه د سپاهیان میهن د مشر یا قوماندانانو په اړه کوم کره معلومات نه دي خپاره شوي.

دې وسله والې ډلې د جمعې ورځې په سهار د بدخشان د یفتل پایین ولسوالۍ پر ودانۍ برید وکړ او خپل بیرغ یې د ولسوالۍ پر ودانۍ ورپاوه. سرچینې وايي، د سپاهیان میهن غړو طالب ځواکونه بې‌وسلې کړي او له ځان سره یې پوځي وسلې او تجهیزات وړي دي.

سپاهیان میهن له یفتل پایین ولسوالۍ تر وتلو وروسته نیول شوې وسلې او پوځي تجهیزات هم نندارې ته وړاندې کړل.

ځايي سرچینو افغانستان انټرنشنل ته تایید کړې چې د سپاهیان میهن د نوې راڅرګندې شوې جبهې ځواکونو د بدخشان یفتل پایین ولسوالي د څو ساعتونو لپاره د طالبانو له کنټروله وایسته. د سرچینو په وینا، دغو ځواکونو د ولسوالۍ پر مرکز تر برید وروسته د هغه ځای وسلې او پوځي تجهیزات هم له ځان سره یوړل.

ولې یفتل پایین؟

د سپاهیان میهن لومړنی برید د بدخشان په یفتل پایین ولسوالۍ کې ترسره شو؛ هغه سیمه چې فیض‌اباد ته نږدې موقعیت لري او د پوځي پلوه، د بدخشان د ځینو غرنیو ولسوالیو په پرتله، زیاته زیان‌منونکې بلل کېږي.

د ځايي شنونکو په باور، د همدې ولسوالۍ ټاکل ښيي چې دا ډله لا هم پراخ پوځي توان او کافي جګړه‌ییزه تجربه نه لري. که څه هم د دې ډلې ځواکونه وتوانېدل د څو ساعتونو لپاره د ولسوالۍ ودانۍ ونیسي، خو د طالبانو د مرستندویو ځواکونو له چټک رسېدو وروسته شاتګ ته اړ شول.

ځینې امنیتي سرچینې هم باور لري چې د سپاهیان میهن ډېری غړي مسلکي پوځیان نه، بلکې ملکي او ځايي کسان دي.

بدخشان؛ د طالبانو د مخالفتونو نوی مرکز

بدخشان په وروستیو کلونو کې د طالبانو د مخالفو وسله‌والو ډلو د فعالیتونو له مهمو مرکزونو څخه ګڼل کېږي. په دې ولایت کې د مقاومت ملي جبهې او د افغانستان ازادۍ جبهې څو ځله د طالبانو پر ځواکونو د بریدونو مسوولیت منلی دی. دغه بریدونه تر ډېره د کمینونو، چریکي عملیاتو او د طالبانو پر پوستو د بریدونو په بڼه ترسره شوي او په ځینو مواردو کې یې طالبانو ته مرګ ژوبله هم اړولې ده.

اوس د سپاهیان میهن راڅرګندېدل ښيي چې په بدخشان کې د وسله‌والو مخالفتونو لمن پراخېږي او نوي لوبغاړي هم دې ډګر ته داخل شوي دي.

د سپاهیان میهن راڅرګندېدل په داسې مهال دي، چې په بدخشان کې په وروستیو میاشتو کې کړکېچونه زیات شوي دي. دا ولایت د طالبانو د خپلمنځي اختلافونو، د کانونو پر سر د سیالیو، ټولنیزو ترینګلتیاوو او د عامه نارضایتۍ د زیاتېدو شاهد پاتې شوی دی.

داسې ښکاري چې طالبانو هم دا وضعیت جدي نیولی دی. په وروستیو اونیو کې د طالبانو د دفاع وزیر محمد یعقوب بدخشان ته سفر کړی، له څو ولسوالیو لیدنه یې کړې او طالبانو هممهاله په دې ولایت کې یوه نوې پوځي قطعه جوړه کړې او نور ځواکونه یې هم هلته ځای پر ځای کړي دي.

په بدخشان کې د طالبانو د امنیه قوماندانۍ ویاند پرکوز یفتل ولسوالۍ برید تایید کړ او وايي، چې د طالبانو د ځواکونو له رسېدو وروسته بریدګر بېرته شاتګ ته اړ شوي دي.

د جمعې په سهار د سپاهیان میهن په نامه وسله والې ډلو شاوخوا ۲۰ او ۲۵ وسله والو ددې ولسوالۍ ودانۍ د څو ساعتونو لپاره ونیوله او انځورونه یې هم خپاره کړل.

ځايي سرچینې وايي چې طالبانو په ولسوالۍ کې کور په کور د پلټنې عملیات پیل کړي او د سیمې یو شمېر اوسېدونکي او ځینې طالبان یې هم نیولي دي.

د بدخشان د طالبانو د پولیسو ویاند احسان‌الله کامګار د جمعې په ورځ په یوه پیغام کې ویلي چې برید هغه مهال ترسره شو چې د ولسوالۍ لوړپوړي مسوولان په رخصتۍ کې وو.

کامګار ادعا کړې چې د طالبانو د ځواکونو له رسېدو وروسته بریدګر په شا وتمبول شول او یو شمېر یې هم ونیول شول. خو هغه د بریدګرو او نیول شویو کسانو د شمېر په اړه نور جزییات نه دي ورکړي.

د طالبانو اړوندو اکاونټونو کې د یو شمېر کسانو د نیول کېدو انځورونه خپاره شوي، چې ادعا کوي پر ولسوالۍ د بریدګرو وسله والو دي، خو ددې کسانو هویت تر دې دمه نه دی روښانه شوی.

د جمعې په سهار د بدخشان ولایت د یفتل ولسوالۍ پر ودانۍ د «سپاهیان میهن» په نوم نوې وسله والې ډلې له برید وروسته، طالبانو په دې ولسوالۍ کې کور په کور پلټنې پیل کړې او یو شمېر کسان یې نیولي دي.

ځايي سرچینو افغانستان انټرنشنل ته ویلي چې یفتل ولسوالۍ ته طالبانو د خپلو مرستندویه ځواکونو له لېږلو وروسته کور په کور پلټنې پیل کړې او یو شمېر محلي کسان یې نیولي دي.

د سرچینو په وینا، طالبانو د سیمې یو شمېر اوسېدونکي او دغه راز د خپلو ځايي ځواکونو ځینې غړي نیولي دي.

سرچینې وايي، طالبان د هغو کسانو په لټه کې دي چې د جمعې د سهار په برید کې یې لاس درلود.

ځايي سرچینې ټینګار کوي چې په نیول شویو کسانو کې ملکي وګړي او د سیمې اوسېدونکي هم شامل دي.

تر اوسه روښانه نه ده چې طالبانو ولې خپل محلي غړي نیولي دي، خو ځینې سرچینې اټکل کوي چې ښايي پر دغو کسانو له بریدګرو سره د همکارۍ یا د برید د مخنیوي په برخه کې د غفلت شک وي.

افغانستان انټرنشنل ته رسېدلي انځورونه ښيي چې طالبانو یو شمېر کسان نیولي دي.

د طالبانو اړوندو رسنیو نیول شوي کسان « بلواګر» ګڼلي، خو د نیول شویو کسانو هویت تر دې دمه روښانه نه دی.

د جمعې په سهار شاوخوا ۲۰ تر ۲۵ وسله والو کسانو د بدخشان پر یفتل پایین ولسوالۍ برید وکړ او د څو ساعتونو لپاره یې د ولسوالۍ ودانۍ په کنټرول کې وه.