د انټرنېټ پرې کېدو په افغانستان کې د بانکوالۍ په برخه کې جدي خنډونه رامنځته کړي
د بلخ په ګډون په څو ولایتونو کې د وای فای انټرنېټ بندېدو پر دوام، په دغه سیمو کې بانکي سیسټم له جدي خنډونو سره مخ شوی دی. سرچینې افغانستان انټرنشنل ته وايي، چې د بانکي خدمتونو له ګډوډۍ وروسته په بلخ کې د طالبانو والي یوسف وفا ویلي چې بانکونه دې د انټرنېټ له بندېدو معاف شي.
طالبانو د دغې ډلې مشر ملا هبتالله په امر دوشنبې په ورځ په پنځو ولایتونو کې انټرنېټي خدمتونه بند کړل.
یوې سرچینې افغانستان انټرنشنل ته وویل: «په مزار شریف کې بانکوالي له جدي خنډونو سره مخامخ وه. له دې وضعیت وروسته، د طالبانو والي امر وکړ چې بانکونه، د برېښنايي تذکرو دفتر او څو ورته ادارې دې د انټرنېټ له بندېدو معاف شي.» د دغه سرچینې په وینا؛ پرون ماسپښین په مزارشریف کې د بانکونو انټرنېټ وصل شو.
د هبتالله لهخوا په دفترونو او کورونو کې د انټرنېټ د پرېکېدو له پرېکړې سره سم، څو ورځې وړاندې د طالبانو د اقتصاد وزارت په مشرۍ یو پلاوی چې د مالیې وزارت او مرکزي بانک چارواکي پهکې شامل وو، کندهار ته لاړ چې د طالبانو له مشر سره د انټرنېټ د پرېکېدو د پایلو په اړه خبرې وکړي.
د دغه ستونزې د حل لپاره د مخابراتي شرکتونو او طالبانو ترمنځ خبرو اترو پایله نه ده ورکړې. سرچینو راپور ورکړی، چې د طالبانو د مخابراتو او معلوماتي ټېکنالوژۍ وزارت کې د خصوصي شرکتونو استازو په یوه غونډه کې د یاد وزارت چارواکو اعلان وکړ، چې د ګرځنده انټرنېټ سرعت به هم کم او تر ۲ جيبي محدود شي.
یوې باخبره سرچینې وویل: «په دغه غونډه کې ټینګار وشو، چې د طالب مشر امر نهشي بدلېدای او باید په ټول افغانستان کې پلي شي.»
د طالبانو د مخابراتو وزارت ویلي، هر شرکت چې وایفای انټرنېټ ته اړتیا لري، باید رسمي غوښتنلیک ورکړي او د استخباراتو له تایید او د وزارت له مراحلو تېر شي؛ نو بیا د انټرنېټ اجازه ترلاسه کولای شي.
د «نېټ بلاکس» وېبسایټ چې د انټرنېټ محدودیتونه څاري، هم د افغانستان د انټرنېټ ستونزه تایید کړې ده. طالبانو په کندهار، روزګان، هلمند، نیمروز او بلخ ولایتونو کې د بېسیم انټرنېټ (وایفای) کارول بند کړي دي. له دغه انټرنېټ نه په کورونو، ادارو او شرکتونو کې کار اخیستل کېده.
طالبانو په داسې وخت کې انټرنېټ بند کړی، چې په تېرو څلورو کلونو کې یې تل ادعا کړې چې په افغانستان کې د پانګونې لپاره شرایط تر بل هر وخت ښه شوي دي. طالب چارواکو تازه په یوه غونډه کې په کابل کې بهرني پانګهوال بللي وو، چې په افغانستان کې پانګونه وکړي.
خو له بل خوا دوی انټرنېټي خدمتونه چې د بانکي سیسټم او د نړۍوالې اړیکې لپاره یو اساسي اړتیا ده، بند کړي دي.
په هغه شلو کلونو کې چې نړۍواله ټولنه په افغانستان کې وه، د انټرنېټ خدمتونو ډېر پرمختګ کړی و او څو سترې مخابراتي او انټرنېټي کمپنۍ پهکې کار کاوه.
طالبانو انټرنېټي خدمتونه بند کړي، چې دا په اوسنۍ نړۍ کې د بانکوالۍ او مخابراتو لپاره یوه اساسي اړتیا ده. په افغانستان کې د نړۍوالې ټولنې د حضور سره په تېرو دوو لسیزو کې انټرنېټي خدمتونو په هېواد کې د پام وړ پرمختګ کړی او ډېری لوی مخابراتي او انټرنېټي شرکتونه هلته فعالیت لري.
