ځايي سرچینو افغانستان انټرنشنل ته ویلي، چې د پاکستان هوايي ځواکونو د شنبې په شپه په پکتیکا او ننګرهار ولایتونو کې پر پنځو ځایو هوايي بریدونه کړې دي.
سیمهييزو سرچینو افغانستان انټرنشنل ـ پښتو ته ویلي، چې پاکستاني ځواکونو د پکتیکا له برمل ولسوالۍ وروسته د ننګرهار پر خوګياڼو ولسوالۍ هم هوايي بریدونه کړي دي.
محسن داوړ په اېکس کې لیکلي، چې افغان طالبان لا هم په پاکستان کې خپل دفترونه چلوي.
داوړ په دې باور دی، چې طالبانو ته دوه لسیزې په پاکستان کې پناه ورکړل شوه، مشروعیت او جواز ورکړل شو او د فشار د الې په توګه استعمال شول.
نوموړي پاکستاني نظامیانو ته په خطاب کې وویل، چې «اوس د طالبانو مسوولیت په بل چا نه شئ اچولی ځکه د هغو تګلارو، پاليسۍ ناکامۍ ومنئ چې افغانستان یې بې ثباته کړ او اغېزې به یې نن پاکستان هم زغمي».
محمد داودزي په اېکس کې لیکلي، چې «مونږ دا برید په کلکه غندو، د پاکستان د پوځ بې کفایته مشرتابه ته یادونه کوو، چې له نن څخه ۷۶ کاله مخکې د پاکستان هوایي الوتکو پر کونړ بمباري وکړه اوافغانانو هغه تیری تر ننه نه دی بښلی».
هغه خبرداری ورکړی،چې که طالبان «په افغانستان کې د مېشتو ترهګرو ډلو» پر ضد جدي اقدام ونه کړي، پاکستان به له دې هم سخت متقابل ګامونه پورته کړي.
اصف دراني ټینګار کړی،چې طالبان باید د افغانستان په خاوره کې د وسله والو ډلو د حضور او فعالیت څخه انکار پرېږدي او د یوه «مسوول حکومت» په توګه باید د افغانستان له خاورې د ګاونډیو هېوادونو پر ضد د فعالیت مخه ونیسي.
هغه زیاته کړې چې که په راتلونکي کې د باور وړ اقدام ونه شي، پاکستان ښايي ځان اړ وبولي چې د افغانستان په خاوره کې د فعالو وسله والو ډلو او شبکو پر ضد لا سخت متقابل اقدامات وکړي.
بل خوا د پاکستان د اطلاعاتو وزارت اعلان کړی چې د شنبې په شپه یې په ننګرهار او پکتیکا ولایتونو کې د تحریک طالبان پاکستان (ټي ټي پي)او داعش خراسان اړوند اووه پټنځایونه په نښه کړي دي.
په ننګرهار کې د طالبانو د امنیه قومندانې ویاند سید طیب حماد ویلي چې د پاکستاني پوځ په دغو هوایي بریدونو کې یوازې د دغه ولایت په بهسود ولسوالې کې د یوې کورنۍ ۱۸ ملکي وکړي وژل شوي او ۵ نور ټپیان دي.
طالبان په افغانستان کې د پاکستاني طالبانو حضور ردوي او پر اسلام اباد تور لګوي، چې د افغانستان پولو ته څېرمه د داعش د روزنې مرکزونو پالنه کوي.
په ننګرهار کې د طالبانو د امنیه قوماندانۍ ویاند سید طیب حماد په یوه ویډیویي پیغام کې ویلي، چې یاد بریدونه د بهسودو، خوګیاڼو او غني خېلو په ولسوالیو کې شوي.
طالب ویاند زیاته کړې، چې پاکستاني جیټ الوتکو د بهسودو ولسوالې د ګردي کڅ په سیمه کې د ملکي وګړو یو کور په نښه کړې، چې له امله یې ۱۸ کسان وژل شوي او ۵ نور ټپیان دي.
د هغه په وینا، له ۱۸ وژل شویو کسانو څخه د ۱۳ جسدونه له خاورو اېستل شوي او ۵ اوس هم له خاورو لاندې دي چې د ولسي وګړو په همکارۍ یې لټون دوام لري.
حماد ویلي، چې پاکستاني الوتکو بل برید د ننګرهار په خوګیاڼو ولسوالې کې کړی چې په پایله کې یې دوه کسان ټپیان شوي او د درملنې لپاره روغتون ته لېږدول شوي دي.
بل خوا په درېیم برید کې په غني خېلو ولسوالې کې یو کور په نښه شوې چې یاد کور په بشپړ ډول ویجاړ شوې خو ځاني تاوان نه لري.
مسلمیار ویلي، په ننګرهار او پکتیکا ولایتونو کې شوي هوایي بریدونه د لسګونو بېګناه ملکي وګړو د وژل کېدو او د نړیوالو قوانینو د ښکاره نقض سبب شوي دي.
هغه زیاته کړې، چې دا په څرګند ډول د افغانستان د حاکمیت نقض دی او په وینا یې، افغانانو تل د هر ډول بهرني تجاوز پر وړاندې په مېړانه دفاع کړې او دا ډول بریدونه به هم بې ځوابه پاتې نه شي.
نوموړي ټینګار کړی چې د افغانستان پر خاوره هر ډول پوځي اقدام د نړیوالو اصولو او د هېواد د خپلواکۍ خلاف دی او باید ودرول شي.
د طالبانو د بهرنیو چارو وزارت د کب پر درېیمه، د یکشنبې په ورځ په یوه اعلامیه کې وویل، چې د دوی د پاکستاني پوځ له خوا د افغانستان هوايي حریم نقض او پر ولسي وگړو بمباري په کلکو ټکو غندي او د افغانستان د ځمکنۍ بشپړتيا صريح نقض او پاروونکی عمل یې گڼي.
د طالبانو په اعلامیه کې راغلي، چې پاکستاني لوري ته په ډاگه شوې، چې د افغانستان د حریم ساتنه د طالبانو د ادارې شرعي مسوولیت دی او د دغه ډول بریدونو د بدو عواقبو مسوولیت د مقابل لوري پر غاړه دی.
په دې اعلامیه کې د طالبانو د متقابلو اقداماتو په اړه څه نه دي ویل شوي، خو د دې ډلې د ددفاع وزارت ویلي، چې دوی به په مناسب وخت کې وړ او محاسبه شوی ځواب ور کړي.
صالح د زرغون بهیر ګوند د اعلامیې په خپرولو سره دغه بریدونه غندلي او وايي، چې د طالبانو غیر قانوني او ملي ضد واکمني د پاکستان د مستقیمې مالي او پوځي مرستې او د دوحې تړون له لارې پر افغانانو تحمیل شوې ده.
زرغون بهیر د دوحې تړون شرمناکه استخباراتي معامله ګڼلې ده.
سید اکبر اغا په اېکس کې لیکلي، چې دا عمل د نړیوالو قوانینو او بشري اصولو ښکاره سرغړونه بولي.
نوموړي ویلي، چې که ملګري ملتونه رښتینی او خپلواک واک ولري، نو باید د داسې اعمالو عاملین د نړیوال قانون منګولو ته وسپاري او حساب ورڅخه وغواړي.
سید اکبر اغا ټینکار کوي، چې خو بیا هم افغانان د خپل هېواد د دفاع واک لري او د مناسب ځواب ورکولو بشپړ حق لري.
اتمر ویلي،چې دغه اقدام د هېوادونو د ملي حاکمیت، سولهییز ګډ ژوند او بشردوستانه نړیوالو اصولو ته په بشپړې بېاعتنایۍ شوی او هېڅ حقوقي او اخلاقي توجیه نه لري.
د هغه په وینا، دا بریدونه د افغانستان د خلکو له سخت غبرګون او پراخې غندنې سره مخ شوي دي.
نوموړي ټینګار کړی چې د پاکستان د پوځ د انګېرنې خلاف، دا ډول پوځي اقدامات نه یوازې دا چې د تحریک طالبان پاکستان(ټي ټي پي)پر وړاندې مخنیوی کوونکی رول نه شي لوبولای، بلکې د ناامنۍ او بېثباتۍ د زیاتېدو لامل ګرځي.
د ده په وینا، د ملکي خلکو د کورونو بمبارول د امنیتي ننګونو معقول حل نه دی.
اتمر،له پاکستاني حکومت او پوځ غوښتي چې له مسوولیتپالنې کار واخلي، د افغانستان پر خاوره له هر ډول تېري ډډه وکړي او د نیابتي ډلو د ملاتړ پالیسو په اړه ځواب ویونکی واوسي.
هغه خبرداری ورکړی،چې دا بریدونه ښايي سیمهییز تاوتریخوالی لا زیات کړي او د سولې او امنیت لپاره جدي پایلې ولري.
د اتمر په باور، امنیت شورا باید د سولې د ټینګښت، د قانونمندې مبارزې له لارې د ترهګرۍ د مخنیوي، د تېري د درولو او د دواړو هېوادونو د خلکو د بنسټیزو حقونو د خوندي کولو لپاره قاطع ګامونه واخلي.
اتمر، همداراز د طالبان له مشرانو وغوښتل چې د ملي یووالي د ساتنې لپاره مسوولانه، سنجول شوي او عاجل اقدامات وکړي. د هغه په خبره، باید ژر تر ژره بینالافغاني خبرې پیل شي څو ملي پخلاینه تامین، د ټولو وګړو بنسټیز حقوق تضمین او د هېواد د راتلونکي په ټاکلو کې د خلکو ماناداره ګډون یقیني شي.
اسماعیل میاخېل په خپل اېکس کې لیکلي، «پاکستان هیڅ ددې حق نه لري چې د هرې پلمې په خاطر زموږ کلي او کورونه بمبار کړي».
نوموړی زیاتوي، چې د تېرې شپې برید چې د روژې په مبارکه میاشت کې یې لسګونه ملکي وګړي شهیدان کړل، یو غیرانساني عمل او د افغانستان د ملي حاکمیت ښکاره نقض دی.