په اسراییلي بریدونو کې د سپاه پاسداران ۲۰ لوړپوړي قوماندانان وژل شوي
د ایران سپاه پاسدارانو اړوند فارس خبري اژانس راپور ورکړی، چې اسراییل ته د جاسوسۍ په تور یې یو زنداني «اعدام» کړی دی. په راپور کې د اعدام شوي کس نوم «اسماعیل فکري» ښودل شوی دی.
تر دې وړاندې هم ایران ورته اعدامونه کړي او له اسراییل سره یې د روانو شخړو په لړ کې لسګونه کسان اسراییل ته د جاسوسۍ په تور هم نیولي دي.
تهران ویلي، ځینو کسانو د دوی له محرمو ځایونو وېډیوګانې کولې او بیا یې د اسراییل «موساد استخباراتي شبکې» ته استولې.
په تل ابیب کې د امریکا سفارت اعلان کړی، چې په «کور پاتې شئ» د پرېکړې له مخې به نن دوشنبه د (غبرګولي ۲۶مه) د دوی سفارت تړلی وي. همدا راز زیاته شوې، د امریکا سفارت ته نږدې د ایراني توغندیو د لګېدو له امله د دوی ودانۍ او کارکوونکو ته هېڅ ډول زیان نه دی اوښتی.
د ایران ولسمشر مسعود پزشکیان له اسراییل سره د روانو شخړو په لړ کې ویلي، چې ملت یې روښانه کړې چې د ټولو «نامردیو» پر وړاندې په مېړانه او ټینګ هوډ ولاړ دی. هغه د ایران له وګړو غوښتي، چې تر بل هر وخته اوس یووالي ته جدي اړتیا ده.
د اسراییل پوځ وایي، چې په تهران کې یې د سپاه پاسداران د قدس ځواک مرکزي دفتر په نښه کړی دی. د اسراییل پوځ په وینا؛ په دغه دفتر کې د قدس ځواک پلان لاره، چې په منځني ختیځ کې د ایران حکومت نیابتي څانګو له لارې د اسراییل پر وړاندې عملیات ترسره کړي.
د ایران او اسراییل ترمنځ د کړکېچ په لړ کې د طالبانو مالیې وزارت خبر ورکړی، چې له ایران سره یې پولې پرانېستې دي او سوداګريزه راکړه ورکړه هم پرته له کومې ستونزې په عادي توګه روانه ده.
د طالبانو تر ادارې لاندې باختر اژانس د خپلو سرچینو له قوله لیکلي، چې ایران ته په نږدې پولو کې ګمرکي چارې هم روانې دي او په بندر عباس کې د افغان سوداګرو توکي هم پرته له کوم ځنډ و خنډ څخه بارېږي.
دغه راپورونه داسې مهال خپرېږي، چې اسراییل پر بندر عباس هم بریدونه کړي دي.
د اوکراین د بهرنیو چارو وزارت اعلان کړی، چې پر اسراییل د ایران له لوري د شویو بریدونو په لړ کې ۵کسه اوکراینیان هم وژل شوي دي. د خبرپاڼې له مخې؛ دغه کسان د شنبې په ورځ د (غبرګولي ۲۴مه) د اسراییل پلازمېنې پر بت یام سیمه شويو بریدونو کې وژل شوي.
اوکراین زیاته کړې، د دوی وژل شوي وګړي ټول د یوې کورنۍ غړي دي چې په کې درې ماشومان هم شامل دي.
د سوریې د بشري حقونو څار بنسټ ویلي، د ایران او اسراییل ترمنځ د روان کړکېچ له امله یوه بې پېلوټه الوتکه د دغه هېواد په طرطوس سیمه کې پر یو کور غورځېدلې چې له امله یې یوه مېرمن وژل شوې ده. یاد بنسټ وایي، ښايي دغه ډرون الوتکه ایرانۍ وي.
د اسراییل د بهرنیو چارو وزیر ګیدیون سعار له سي اېن اېن ټلوېزیوني شبکې سره په یوې مرکه کې ویلي، چې هېواد یې په ایران کې د نظام بدلون فکر نه لري. هغه زیاته کړې، اسرایلیان د ایران عام وګړي خپل دوښمنان نه ګڼي.
نوموړی داسې مهال دغه څرګندونې کوي، چې تر دې وړاندې د اسراییل لومړي وزیر بنیامین نتنیاهو په ښکاره ټکو له ایرانیانو څو څو ځله وغوښتل چې د اوسني رژیم خلاف راپورته شي.
هغه دا هم ویلي و، چې له ایرانیانو سره به د دغه کار لپاره په بشپړه توګه همکاري وکړي.
د اسراییل ۱۲ خبري اژانس راپور ورکړی، چې پر اسراییل د ایران په تازه توغندیز برید کې ۶۷ کسان ټپیان شوي دي. تر دې وړاندې د اسراییل بېړنیو خدمتونو ادارې ویلي و، چې د دغه هېواد په بېلابېلو سیمو کې د ایران توغندیزو بریدونو له امله ۲۵ کسان برسېرن ټپیان شوي دي.
جېرو زالم پوسټ ورځپاڼې راپور ورکړی، چې د ایران لهخوا د تازه توغندیزو بریدونو له کبله د اسراییل په پلازمېنه کې درې کسان وژل شوي دي. تر دې دمخه ځايي رسنیو راپور ورکړی و، چې ایران د توغندیزو بریدونو یوه بله څپه هم پیل کړې او نږدې ۲۵تنه یې برسېرن ټپیان کړي دي.