ازادۍ جبهه: د طالبانو په رسمیت پېژندنه، ترهګرۍ ته د مشروعیت ورکولو معنا لري
د افغانستان ازادۍ جبهې په یوه اعلامیه کې د روسیې له لوري د طالبانو د رسمیت پېژندلو په غبرګون کې ژوره خواشیني او اندېښنه څرګنده کړې ده. یادې جبهې د مسکو دغه اقدام د افراطیت پراخولو، ترهګرۍ او د سیمې د امنیت لپاره یو ستر ستراتیژیک ګواښ بللی دی.
په اعلامیه کې ویل شوي، چې د تېرو څلورو کلونو راهیسې د طالبانو تر واک لاندې افغانان له سختو، ظالمانه او تبعیضي کړنو قرباني دي.
د ازادۍ جبهه خبرداری ورکوي، چې د طالبانو رژیم نه یوازې بدلون نه دی کړی؛ بلکې افغانستان یې نړۍوالو ترهګرو ډلو لپاره یو خوندي پناه ځای ګرځولی، چې ډېر ژر به د منځنۍ اسیا او ان د روسیې امنیت له جدي ګواښ سره مخ کړي.
په اعلامیه کې وړاندې لیکل شوي: «د طالبانو په رسمیت پېژندنه، ترهګرۍ ته رسمي بڼه ورکول دي. دا ګام به د پاکستاني طالبانو تحریک، داعش خراسان، القاعده، د تاجکستان انصارالله، حزب التحریر او نورو افراطي وسلهوالو شبکو د پیاوړتیا لامل شي او د منځنۍ اسیا ټیکاو ته به ښکاره ګواښ وي.»
همدا راز زیاته شوې: «افغانستان ته د امنیتي او رقابتي لید له مخې کتل، یوه سټراتېژیکه تېروتنه ده. طالبان له افراطي ډلو سره له نظره نه جلا کېدونکي دي او د دوی ملاتړ به نورو همفکره افراطي ډلو ته دا پیغام ورکړي، چې کولای شي په منځنۍ اسیا کې ورته بنسټپاله رژیمونه جوړ کړي».
دغه جبهه هممهاله یو ځل بیا ټینګار کوي، چې د طالبانو پر ضد خپل مقاومت ته دوام ورکوي او د ازادۍ غوښتونکو افغانانو ترڅنګ د عدالت، ډېموکراسۍ او ازادۍ لپاره به قربانۍ ورکړي.
