په خوست، ننګرهار او کونړ کې د بېپیلوټه الوتکو بریدونه
خلاصه
پاکستان پر خوست، ننګرهار او کونړ د ډورن هوايي بریدونه کړي دي.
پخواني ولسمشر حامد کرزي د افغانستان پر خاورې د پاکستان برید غندلی.
طالبانو په کابل کې د پاکستان سفیر احضار کړی دی.
حکمتیار پر خوست او ننګرهار د پاکستان بریدونه پاروونکي وبلل
د حزب اسلامي مشر ګلبدین حکمتیار پر خوست او ننګرهار د پاکستان د بې پیلوټه الوتکو هوايي بریدونه غندلي او هغه یې پاروونکي او غیر مسوولانه ګڼلي دي. حکمتیار وايي، « له چارواكو غواړو د لانجو معقول بديلونه او سوله یيزې حل لارې ولټوي نه د زور ازمويلو لارې».
د حزب اسلامي مشر د شنبې په ورځ پر خپل اېکس ولیکل، چې، « د پاكستان له لوري په خوست او ننګرهار كي پر څو ملکي اهدافو وروستي هوايي بريدونه په كلكه غندو؛ غير مسوولانه او پاروونكي یې بولو او پايلي یې بدې».
جمعه خان همدرد: له نړۍ والو غواړو د پاکستان دغه ډول بریدونو پر وړاندې چوپ پاتې نشي
د تېر جمهوري نظام پر مهال د پکتیا والي جمعه خان همدرد پر ننګرهار، خوست او کونړ ولایتونو د پاکستان د بې پيلوټه الوتکو بریدونه د افغانستان پر ملي حاکمیت، ځمکنۍ بشپړتیا او انساني ارزښتونو ښکاره تېری بللی.
ښاغلي همدرد زیاته کړې: «موږ دا بریدونه په کلکو ټکو غندو او له نړۍ والو غوښتنه کوو، چې د دا ډول ناقانونه بریدونو پر وړاندې چوپ پاتې نه شي.»
د جمعه خان همدرد په وینا، دغه ډول بریدونه نه یوازې له نړۍوالو اصولو او د ګاونډیتوب له اخلاقو سرغړونه ده، بلکې د یوه خپلواک ملت پر ویاړ، حیثیت او ژوند نېغ په نېغه یرغل دی.
نوموړي همداراز له افغانانو غوښتي چې د ملي یووالي په ساتلو سره، د هر ډول بهرنۍ مداخلې او داخلي بې غوریو پر وړاندې یو موټی ودرېږي.
طالب چارواکی: د خلکو امنیت او ساتنه مو لومړیتوب دی
د خوست ولایت لپاره د طالبانو والي مرستیال محبوب شاه قانت د سپېرې ولسوالۍ اړوند سورکاخ سیمه کې د پاکستاني پوځ له لوري د بېپیلوټه الوتکې په برید کې له ټپي شویو کسانو د لیدنې په ترڅ کې د خلکو امنیت او ساتنه لومړیتوب بللی، خو تر اوسه یې هېڅ عملي ورته اقدام نه دی ترسره کړی.
طالب مرستیال والي ویلي، «د دغسې بریدونو پر وړاندې به لازم دریځ خپلوي او د خلکو امنیت او خوندیتوب یې لومړیتوب دی.»
افغانان د پاکستان د پوځ د دغه ډول تیریو په مقابل کې د ورته عمل غوښتنه لري، خو د طالبانو دفاع وزارت بیا له شاوخوا ۲۴ساعتونو وروسته یوازې یوه نرمه، لنډه او ډيپلوماټيکه اعلامیه خپرې کړې او د ورته اقدام په تړاو یې هېڅ هم نه دي ویلي.
د طالبانو دفاع وزارت د پاکستان دغه تېری ظالمانه او له وحشته ډک برید ګڼلی او زیاته کړې یې ده، «داسې د ظلم او وحشت څخه ډک اقدامات د هیچا په ګټه نه دي؛ بلکې د دواړو مسلمانو ملکونو د خلکو ترمنځ د فاصلې پیدا کولو او د دواړو اړخونو ترمنځ د نفرت سبب ګرځي او دغه ډول بېمسوولیته کړنې به عواقب ولري.»
اعلامیه کاږي، «موږ د پاکستان دوه مخې او منافقانه سیاستونه، چې له یوې خوا ځان د ترهګرۍ پر وړاندې قرباني بولي او له بلې خوا د افغانانو پر کورونو بمبارۍ کوي، په کلکو ټکو غندي.»
د افغانستان د سولې او ولسواکۍ ملي نهضت زیاتوي، «له بده مرغه، هغه بې ځایه شوي وزیرستانیان، د باجوړ او نورو سیمو خلک چې د پاکستان له ظلم څخه افغانستان ته را اوښتي، دلته هم د همدې پوځ د بمبارۍ قرباني کېږي. دا یوه لویه انساني غمیزه ده چې نړۍواله ټولنه یې باید جدي په پام کې ونیسي.»
دغه نهضت همداراز د افغانستان له ټولو سیاسي او ټولنیزو قشرونو غوښتي چې د پاکستان د دغه ډول تېریو پر وړاندې ګډ ملي دریځ خپل کړي.
