اسراییلي پوځ د یوې خبرپاڼې په خپرولو سره ویلي، چې د دوی هوايي ځواک په لوېدیځ او مرکزي ایران کې پر ځینو موخو بریدونه کړي دي.
سپاه پاسداران پورې اړوند تسنیم خبري اژانس د ځینو سرچینو په حواله راپور ورکړی، چې اسراییل په تهران، اصفهان، تبرېز او د ایران په لوېدیځ کې ځینې ځایونه په نښه کړي دي.
اسراییلي پوځ ویلي، چې ځواکونه یې د بشپړ چمتووالي او تیارسۍ په حال کې دي او د هغو لورو پر وړاندې به خپلو عملیاتو ته دوام ورکړي چې د اسراییل امنیت ته ګواښ ګڼل کېږي.
د اسراییلي پوځ ویاند زیاته کړه، چې ایران پر ضاحیه د اسراییلي پوځ برید سره خپل برید تړلی بولي. د هغه په وینا؛ ایران پر اسراییل د تازه برید سره دوه میاشتنی اوربند مات کړی دی.
د یادې سرچینې په وینا؛ د بیروت په څنډه کې د اسراییل د برید پر وړاندې د سپاه پاسداران غبرګون تر هغې پرتله چټک و، چې له مجتبی خامنهیي سره د پیغامونو تر تبادلې وروسته شوی وي.
تر دې وړاندې داسې راپورونه خپاره شوي وو، چې له یوې خوا د سپاه پاسداران د لوړپوړو چارواکو او قوماندانانو او له بلې خوا د مجتبی خامنهیي د دفتر ترمنځ د پیغامونو تبادله وخت نیسي.
ورته مهال د برېتانيا د بهرنيو چارو وزيرې يويټې کوپر ويلي، د ایران او اسراییل ترمنځ د جګړې بيا پيلول د هيچا په ګټه نهدي او دواړه لوري بايد له زغم کار واخلي. هغې ټینګار وکړ، چې یوې دوامداره هوکړې ته د رسېدو لپاره باید خبرې اترې دوام ومومي.
همدارنګه د یادې سیمې ټولو کارکوونکو ته د سیمې پرېښودو امر شوی دی.
په دغه خبرپاڼه کې چې د «لومړني راپور» په نوم خپره شوې ویل شوي، چې دغه برید د یاد صنعتي کمپلېکس پر څو موخو شوی او نور جزییات به یې وروسته اعلان شي. څو شېبې مخکې ایراني رسنیو د ایراني چارواکو په حواله راپور ورکړی و، چې دغه کمپلېکس د اسراییل په هوايي برید کې په نښه شوی او ځینې برخې یې زیانمنې شوې دي؛ خو د تلفاتو په اړه یې معلومات نهدي ورکړي.
د اسراییل پوځ ویلي، د وضعیت له ارزونې وروسته د کورنۍ جبهې قوماندانۍ خلکو ته امر کړی چې له خپلو کورونو ووځي؛ خو ټینګار یې کړی چې باید لاهم د یادې ادارې لارښوونې مراعت کړي.
د اسراییل پوځ تر دې مخکې ویلي و، چې د دغه هېواد د هوايي دفاع سیسټمونه لاهم د ایران له لوري د اسراییل پر لور توغول شوي توغندي شنډوي.
د اسرايیل پوځ د خبرپاڼې له مخې؛ د کورنۍ جبهې قوماندانۍ اړوندو سیمو کې د خلکو ګرځنده ټیلیفونونو ته احتیاطي خبرداری لېږلی او له خلکو یې غوښتي، چې امنیتي لارښوونې عملي کړي.
په خبرپاڼه کې راغلي، د خبرداري له ترلاسه کولو وروسته خلکو ته سپارښتنه شوې چې خوندي سیمو ته ولاړ شي او تر بلې خبرتیا پورې هلته پاتې شي.