د منځني ختیځ کړکېچ؛ پر اسراییل د ایران برید

خلاصه

امریکايي رسنیو د دوشنبې په ماښام د لبنان په جنوب کې د اسراییل د ځمکنیو عملیاتو د پیل خبر ور کړ. رویټرز په خپل راپور کې ويلي، چې د لبنان ځواکونو د اسراییل سره له ګډې پولې شاتګ کړی دی.
په يوه اونۍ کې په لبنان کې د اسراييل په بريدونو کې د حزب الله ۷ جګپوړي قومندانان او سياسي چارواکي وژل شوي د یکشنبې په ورځ د اسراییل د پوځ لوی درستيز هرزي هالوی دې شمېر ته په اشارې وويل: «حزب الله خپل سر له لاسه ورکړی او موږ باید د دغې ډلې په وړاندې خپلو درنو بريدونو ته دوام ورکړو.»
د لبنان په سویل کې د ځمکنیو عملیاتو له پیل څو ساعته وروسته، د اسراییل پوځ په یوه بیانيه کې وویل، چې د لبنان په جنوبي سرحدي سیمه کې یې د حزب الله پر اهدافو «محدود او هدفي» بریدونه پیل کړي دي.
د اسراییل ورځپاڼې هارتز راپور ورکړی، چې د بایډن حکومت د دریم هیواد له لارې ایران ته خبرداری ورکړی، چې که په اسراییل مستقیم برید وکړي نو د اسراییل غبرګون به تر وري میاشتې پراخ او سخت وي.

AP ۱۴۰۳ تله ۱۲ ۱۲:۱۲ GMT+۱

د اسراییل پوځ: په تېرو ۲۴ ساعتونو کې د حزب الله ډلې ۶۰ کسان وژل شوي دي

د اسراییل پوځ اعلان کړی، چې په تېرو ۲۴ ساعتونو کې د حزب الله ډلې ۶۰ کسان وژل شوي او د لبنان په سویل کې د یادې ډلې څه باندې ۲۰۰ هدفونه د اسراییلي ځواکونو په هوایي او ځمکني عملیاتو کې په نښه شوي دي.

د راپورونو له مخې، د حزب الله ډلې شاوخوا ۱۵ غړي چې نن سهار د بنت جبیل د ښاروالۍ په ودانۍ کې پټ شوي و د اسراییل د یوه هوایي برید په پایله کې ووژل شول.
د اسرائيل د پوځ په وینا، د دوی جنګي الوتکو د بنت جبیل ښاروالۍ پر ودانۍ له دې امله برید وکړ، چې د حزب‌الله د وسلو د ګودام په توګه ترې استفاده کېده.
اسراییلي ځواکونو بیا په یوه بل عملیات کې هم د حزب الله ډلې یو شمېر نور غړي ووژل.
دا په داسې حال کې ده، چې د حزب الله دوو غړو د پنجشنبې په ورځ د اسراییلي ځواکونو پر خوا ډزې وکړې، چې وروسته بیا د اسراییل د بې پیلوټه الوتکې په برید کې ووژل شول.
د اسراییل پوځ همداراز اعلان وکړ، چې په تېرو ۲۴ ساعتونو کې یې د لبنان په سویل کې د حزب الله شاوخوا ۲۰۰ هدفونه چې په کې ګودامونه، تونلونه او د یادې ډلې د اوسېدو ودانۍ شامل دي، په نښه کړي دي.

AP ۱۴۰۳ تله ۱۲ ۱۰:۰۹ GMT+۱

قطر: هغه څه چې په سیمه کې روان دي "ډله‌ییزه وژنه" ده

د قطر امیر شیخ تمیم بن حمد ال ثاني ویلي، هغه څه چې په سیمه کې روان دي "ډله‌ییزه وژنه" ده. هغه د اسراییل د "معافیت" په اړه خبرداری ورکړی، چې غزه به "په داسې ځای بدله کړي چې اوسېدل به په کې ناشوني" وي.

نوموړي د اسیا د همکاریو په سرمشریزه کې ویلي، د یوه خپلواک فلسطیني دولت جوړول په سیمه کې د تلپاتې سولې لپاره کلیدي موضوع ده.
هغه زیاته کړه:« موږ پر لبنان د اسراییل د تېري د مخنیوي لپاره د اوربند د جدي هڅو غوښتنه کوو.»
له بل پلوه د ایران ولسمشر مسعود پزشکیان خبرداری ورکړی، چې د تهران پر وړاندې د اسراییل د نورو اقداماتو په وړاندې به سخت غبرګون وښيي.

AP ۱۴۰۳ تله ۱۲ ۰۸:۰۹ GMT+۱

لبنان: حسن نصرالله تر وژل کېدو وړاندې له لنډمهاله اوربند سره هوکړه کړې وه

د لبنان د بهرنیو چارو وزیر څرګنده کړه، چې د حزب الله مشر حسن نصرالله په بیروت کې د اسراییل په برید کې تر وژل کېدو مخکې له لنډمهاله اوربند سره هوکړه کړې وه.

د ترکیې د خبری اژانس د راپور له مخې، د لبنان د بهرنیو چارو وزیر عبدالله بوحبیب وویل چې د لبنان د پارلمان مشر له حزب الله سره خبرې اترې کړې وې او حسن نصر الله په لنډمهاله اوربند هوکړه کړې وه.
د لبنان د بهرنیو چارو وزیر زیاته کړه:«چې د حسن نصرالله له هوکړې وروسته مو د دغه پرمختګ په اړه د امریکا او فرانسې استازو ته خبر ورکړی و.»
د امریکا او فرانسې په ګډون ۱۲ هېوادونو او سازمانونو د ډیپلوماټیک حل لپاره د اسراییل او حزب الله ترمنځ د لنډمهاله اوربند په اړه ګډه اعلامیه هم خپره کړې وه.
دغه اعلامیه د سپټمبر په ۲۴مه د حزب الله د مشر حسن نصرالله تر وژنې درې ورځې وړاندې خپره شوې وه.

AP ۱۴۰۳ تله ۱۲ ۰۷:۱۶ GMT+۱

د ایران ولسمشر: په سیمه کې د کړکېچ پراخېدل د امریکا او اروپا په ګټه نه دي

د ایران ولسمشر مسعود پزشکیان ویلي، ایران جګړه او وینه تویېدنه نه غواړي. هغه دارنګه ویلي، چې په سیمه کې د کړکېچ پراخېدل د امریکا او اروپا په ګټه نه دي.

د ایران ولسمشر په دوحه کې له خبریالانو سره په خبرو کې وویل، که اسراییل د غچ اخیستو هڅه وکړي؛ نو د ایران ځواب به سخت او پیاوړی وي.
هغه وویل، چې ایران جګړه او وینه تویېدنه نه غواړي؛ بلکې په سیمه کې سوله او ټیکاو غواړي.
ښاغلي پزشکیان وویل، چې اسراییل د ایران د مېلمه په وژنې سره تاوتریخوالی پیل کړ.
د تېرې سې شنبې په ورځ ایران په اسراییل څه باندې ۲۰۰ بالسټیک توغندي وتوغول، چې ایران دغه برید د اسراییل له‌خوا د اسماعیل هنیه او د حسن نصرالله د وژل کېدو غچ یاد کړی دی.

AP ۱۴۰۳ تله ۱۲ ۰۵:۵۸ GMT+۱

چین د ملګرو ملتونو له امنیت شورا وغوښتل، چې د منځني ختیځ کړکېچ کم کړي

چین د ملګرو ملتونو له امنیت شورا وغوښتل، چې په منځني ختیځ کې د وضعیت د لا کړکېچن کېدو د مخنیوي لپاره بېړني ګامونه واخلي.

په ملګرو ملتونو کې د چين دايمي استازي فو کانګ د چهارشنبې په ورځ د امنيت شورا د يوې غونډې په ترڅ کې وويل، چې د اسراییل او لبنان د شخړې په اړه د تاوتريخوالي د درولو لپاره بايد روښانه او بنسټیزې غوښتنې وشي.
هغه ویلي، چې د امنيت شورا د نړۍوالې سولې او امنيت د ساتلو اصلي مسووليت په غاړه لري.
هغه زیاته کړه، چې ټولې ښکېلې خواوې بايد سياسي او ډيپلوماتيکو حل لارو ته راستنې شي.

AP ۱۴۰۳ تله ۱۲ ۰۵:۴۰ GMT+۱

ګوترېش: د ایران له‌خوا برېدونه د فلسطین د خلکو رنځ نه دوا کوي

د ملګرو ملتونو سرمنشي انتونیو ګوترېش د ایران له لورې پر اسراییل د توغندیزو بریدونو په غبرګون کې ویلي، چې د ایران له‌خوا د فلسطین د خلکو په ملاتړ دغه ډول بریدونه د فلسطینیانو رنځ نه کموي.

د ملګرو ملتونو سرمنشي انتونیو ګوترېش د چهارشنبې په ورځ د (تلې ۱۱مه) د ملګرو ملتونو د امنیت شورا په غونډه کې د ایران له لوري پر اسراییل توغندیز بریدونه سخت وغندل.
نوموړي وویل:« تېره ورځ ایران د اسراییل پر لور شاوخوا ۲۰۰ بالستیک توغندي وتوغول. د اسراییل او اشغال شوې فلسطیني خاورې په مېلیونونو خلک پناه اخیستو ته اړ شوي.»
نوموړی وايي، د ایران له لوري دغه ډول بریدونه د فلسطینیانو رنځ نه دوا کوي:« دغه بریدونه په متضاد ډول د فلسطین د خلکو د ملاتړ یا د دوی د رنځ کمولو لپاره هیڅ ګټه نه کوي.»
دوه ورځې وړاندې د ایران سپاه پاسداران وویل، چې ۲۰۰ توغندي یې د اسراییل د پوځي ځایونو په نښه کولو لپاره توغولي دي.
ایران پر اسراییل دغه برید د حزب الله لبنان ډلې د مشر حسن نصرالله د وژل کېدو په غبرګون ترسره کړی دی.

AP ۱۴۰۳ تله ۱۲ ۰۵:۱۲ GMT+۱

حزب الله د اسراییل پر یوې چورلکې توغندي توغولي دي

حزب الله ویلي، چې د اسراییل په شمال بیت هیلیل ښار کې یې د دغه هېواد په یوې پوځي چورلکې توغندي وېشي چې له امله یې دغه چورلکه شاتګ ته اړ اېستل شوې ده.

حزب الله دا نه دي ویلي، چې دا چورلکه د چهارشنبې په ورځ د دوی په توغندي لګېدلې او که نه.
دا په لبنان کې د اسراییل د بمباریو او په روانه اونۍ کې د لبنان په سوېل کې د اسراییل ځمکني برید له پیل راهیسې پر اسراییلي چورلکو د حزب الله لومړی راپور شوی توغندیز برید دی.

AP ۱۴۰۳ تله ۱۲ ۰۴:۲۰ GMT+۱

امریکا د ایران په اټومي تاسیساتو د اسراییل د بریدونو له ملاتړه ډډه وکړه

د امریکا ولسمشر جوبایډن پر اسراییل د ایران د توغندیو د بریدونو په ځواب کې د ایران پر اټومي تاسیساتو د اسراییل د بریدونو له ملاتړه ډډه کړې.

د امریکا ولسمشر جوبایډن وايي، اسراییل ته یې څرګنده کړې چې د ایران پر اټومي تاسیساتو د اسراییل له بریدونو ملاتړ نه کوي.
د اسراييل پر پوځي تاسيساتو د ايران له توغندويي بريدونو وروسته جوبايډن ټينګار وکړ، چې امريکا به له اسراييله بشپړ ملاتړ ته دوام ورکړي او د توغنديو د بريدونو په غبرګون کې به پر ايران نور اقتصادي بنديزونه ولګول شي.
جوبایډن وویل، د کاناډا، فرانسې، جرمني، ایټالیا، جاپان او بریتانیا په ګډون د جي ۷ هېوادونو هوکړه کړې چې د ایران په اټومي پروګرام به بریدونه کوي.
هغه وویل، چې د منځني ختیځ ټوله سیمه اوس له ګواښ سره مخامخ ده، د جي ۷ هېوادونو هم پر ایران د نویو بندیزونو د لګولو هوکړه کړې ده.
دوه ورځې وړاندې ايران د اسراییل په بريدونو کې د حماس د مشر اسماعيل هنيه او د حزب الله د مشر حسن نصرالله د وژنې غچ اخيستلو په موخه په مستقيم ډول پر اسراییل تر ۲۰۰ ډېر توغندي وتوغول.
ایران ویلي، چې یوازې د اسراییل پوځي تاسیسات یې په نښه کړي.
ایران خبرداری ورکړی، چې که اسراییل غچ واخلي؛ نو له سخت غبرګون سره به مخ شي.
د ایران له برید وروسته د اسراییل لومړي وزیر نتنیاهو په ځواب کې وویل، چې ایران به د دغو بریدونو بیه پرې کړي.
د اسراییل پخواني لومړي وزیر نفتالي بېنېټ هم د اسراییل پر اوسني حکومت د ایران د اټومي وسلو د برید غوښتنه کړې وه.

AP ۱۴۰۳ تله ۱۲ ۰۴:۰۷ GMT+۱

ایراني سرچینې: د اسراییل له بریده مخکې خامنه‌یي حسن نصرالله ته ویلي و، چې له لبنانه ووځي

رویټرز خبري اژانس د ایراني سرچینو له حوالې ویلي، چې ایت الله خامنه‌یي د اسراییل له بریده څو ورځې وړاندې حسن نصرالله ته د اسراییل پلان په اړه خبرداری ورکړی و او هغه ته یې ویلي و چې له لبنانه ووځي.

د ایراني سرچینو په وینا، ایت الله خامنه‌یي حسن نصرالله ته د اسراییلي پلان په اړه خبرداری ورکړی و.
ايراني سرچينې وايي، چې د پيجرونو چاودنو سمدستي وروسته خامنه‌یي د حزب الله مشر ته پيغام ولېږه، چې ايران ته راشي.
ایراني سرچینو ویلي، چې خامنه‌یي پرون پر اسراییل د توغندیو د بریدونو امر کړی و.

سرچینو زیاته کړې، چې ایران اوس د لوړپوړو ایراني چارواکو په منځ کې د اسراییلي جاسوسانو له وېرې اندېښمن دی.
د دغو سرچینو په وینا، ایران په حزب الله او ایراني تاسیساتو کې د بې باورۍ د فضا له امله د خامنه‌یي د خوندیتوب په اړه اندېښمن دی.
ایت الله خامنه‌یي د حزب الله د مشر له وژنې وروسته یو نامعلوم ځای ته انتقال شوی دی.
د لبنان د حزب الله مشر حسن نصرالله د سپټمبر په ۲۷مه نېټه په بيروت کې د اسراییل په بريد کې ووژل شو.
ایران تېره ورځ د حماس د مشر اسماعیل هنیه او حسن نصرالله د غچ اخیستو لپاره پر اسراییل برید وکړ.

AP ۱۴۰۳ تله ۱۲ ۰۳:۳۲ GMT+۱

پاکستان په منځني ختیځ کې د زیاتېدونکي کړکېچ په اړه ژوره اندېښنه څرګنده کړه

د پاکستان د بهرنیو چارو وزارت په منځني ختیځ کې د زیاتېدونکي کړکېچ په اړه ژوره اندېښنه څرګنده کړې ده. دغه وزارت وایي، چې نړۍواله ټولنه دې په سیمه کې د تاوتریخوالي کمولو لپاره ګړندي ګامونه واخلي.

د پاکستان د بهرنیو چارو وزارت وياندې په يوه بيان كې ویلي، چې نړۍواله ټولنه دې د ترهګرۍ كمولو لپاره ګړندي ګامونه واخلي او ټولې خواوې دې سولې ته لومړيتوب وركړي.
د ممتاز زهرا بلوڅ په وینا، د اسراییل د اقداماتو په پایله کې د نړۍوالو قوانینو او د ملګرو ملتونو له منشور څخه په سرغړونې سره په غزه کې د روانې نسل وژنې سره د سیمې سوله او امنیت له ګواښ سره مخ شوي دي.
هغې زیاته کړې، پر لبنان وروستي برید دغه کړکېچ لاپسې زیات کړی دی.
هغه وایي، په فلسطین، لبنان او سیمه کې د بې ګناه ملکي وګړو ژوند له ګواښ سره مخ دی، د فلسطین، لبنان او د سیمې خلک د دې حق لري چې له وېرې او تاوتریخوالي پرته ژوند وکړي.