مقام‌های تاجیک: بیروکراسی امریکا باعث شد پیلوت‌های افغان سه ماه در تاجیکستان بمانند

۱۴۰۰/۸/۱۹

مقام‌های تاجیک بیروکراسی امریکایی را باعث تاخیر سه ماهه در تخلیه پیلوت‌های افغان از تاجیکستان می‌دانند.

بیش از ۱۵۰ پیلوت ارتش افغانستان پس از فرار به تاجیکستان، در شرایط مشابه بازداشت در آن کشور به سر می‌بردند.

آن‌ها روز سه‌شنبه برای رفتن به امریکا به امارات متحده منتقل شدند.

انتظار می‌رود این پیلوت‌ها و دیگر پرسونل نظامی به شمول یک پیلوت زن باردار افغان از امارات به امریکا منتقل شوند.

تاخیر طولانی در تخلیه این پیلوت‌های آموزش‌دیده امریکا توجه اعضای کنگره و مقام‌های نظامی پیشین این کشور را نیز به خود جلب کرد.

در مورد مشابه انتقال یک گروه مشابه از پیلوت‌های افغان از ازبکستان تنها چند هفته به طول انجامیده بود.

یک مقام ارشد تاجیکستان که نخواست نامش گرفته شود گفت "ماشین بیروکراسی ایالات متحده" تا حد زیادی در این تاخیرها مقصر است.

او افزود که پاسپورت‌های پیلوت‌ها از آنها گرفته شده و به کارمندان سفارت برای تایید هویت‌شان داده شد.

این مقام می‌گوید تاجیکستان تمام کمک‌های لازم را در طول اقامت آنها در این کشور فراهم کرده بود.

پربیننده‌ترین‌ها