یک هیات عالی‌رتبه از مقام‌های اتحادیه اروپا به ریاست جوزپ بورل، مسوول سیاست خارجی این اتحادیه در حال بحث با وزیران خارجه کشورهای آسیای میانه در باره وضعیت افغانستان است.
وزیران خارجه تاجیکستان، ترکمنستان، ازبکستان و قیرقیزستان در نشست پشت درهای بسته دوشنبه شرکت دارند.
منابع نزدیک به حکومت تاجیکستان گفته‌اند که وضعیت رو به وخامت انسانی در افغانستان پس از روی کار آمدن طالبان از موضوعات این نشست است.
وزیر خارجه تاجیکستان پیشتر گفته بود که دیدار هیات اتحادیه اروپا از این کشور تا ۲۴ نوامبر (روز چهارشنبه) ادامه می‌یابد.
انتظار می‌رود آقای بورل با امام‌علی رحمان، رییس‌جمهور و سراج‌الدین مهرالدین، وزیر خارجه این کشور گفتگو کند.
بر اساس گزارش سازمان ملل میلیون‌ها نفر در افغانستان با قحطی حاد و گرسنگی گسترده روبرویند و اقتصاد این کشور در آستانه فروپاشی قرار دارد.
ماه گذشته اورزولا فون در لاین، رییس کمیسیون اروپایی اعلام کرد که اتحادیه اروپا ۱/۲ میلیارد دالر به افغانستان کمک می‌کند.