منابع محلی به افغانستان اینترنشنال تایید کردند که روز گذشته نظامیان تاجیکستانی در پاسخ به حمله داعش بر خاک این کشور، بر ولسوالی خواجه‌غار ولایت تخار گلوله‌باری کرده‌اند.

در پی این رویداد شماری از شهروندان که در نزدیک مرز زندگی می‌کردند، خانه‌های شان را ترک کرده‌اند.

شاخه خراسان گروه داعش با نشر پیامی مسئولیت این حمله راکتی را به عهده گرفت و گفت این حمله شام روز شنبه از افغانستان بر نقاط مرزی تاجیکستان صورت گرفته است.

نظامیان تاجیکستانی پس از آنکه چندین راکت از سوی افغانستان بر خاک این کشور شلیک شد، بر ولسوالی خواجه‌غار تخار شلیک کردند.

یک منبع از مرز تاجیکستان به خبرگزاری اسپوتنیک بخش تاجیکستان گفت: «به مرزبانان و پایگاه‌های ما هیچ آسیبی نرسیده است.»

منابع محلی گزارش دادند که نظامیان تاجیکستانی با استفاده از سلاح «دهشکه» از پاسگاه نزدیک به مرز بالای ولسوالی خواجه‌غار گلوله‌باری کردند و شماری از مردم خانه‌های شان را به طور موقت ترک‌ کرده‌اند.

از تلفات این رویداد گزارشی در دست نیست و مقام‌های محلی طالبان در این مورد چیزی نگفته‌اند.

پیش از این نیز چندین راکت از خاک افغانستان به سمت ازبکستان شلیک شد و داعش مسئولیت آن را به عهده گرفت.