شماری از مهاجران افغان در تاجیکستان به افغانستان اینترنشنال گفتند با وجود داشتن اسناد قانونی کمیساریای عالی پناهندگان سازمان ملل، تاجیکستان با جبر و برخورد خشن دست به اخراج آنان زده است. آن‌ها می‌گویند تمام دارایی‌های‌شان ضبط شده و به افغانستان فرستاده می‌شوند.
این مهاجرین می‌گویند اخراج اجباری پناهجویان افغان بدون دلیل و اتهام، سکوت و خاموشی نهادهای حقوق بشری و دفتر کمیساریای عالی سازمان ملل برای پناهندگان را زیر سوال می‌برد.
یکی از پناهجویان افغان در شهر وحدت تاجیکستان می‌گوید وسایل شخصی‌اش را جمع کرده و منتظر «اخراج اجباری» از کشور تاجیکستان است.
چندین پناهجوی دیگر با فرستادن پیام نسبت به همین موضوع ابراز نگرانی کرده‌اند.
گروهی از مهاجران در تاجیکستان با راه اندازی یک هشت در شبکه‌های اجتماعی خواستار توقف اخراج اجباری پناهجویان افغان در تاجیکستان شدند.
روز پنجشنبه ۳ سنبله، کمیساریای عالی پناهندگان ملل متحد در بیانیه‌ای هشدار از تاجیکستان خواست که اخراج اجباری پناهجویان افغان را متوقف کند.
این سازمان هشدار داده است که بازگشتاندن مهاجرینی که به دلیل اذیت و آزار از کشور خود فرار کردند، یک اقدام غیرقانونی است و اخراج اجباری زندگی آنان را با خطر مواجه می‌سازد.
