کارشناس تاجیک به رسانه آسیاپلاس تاجیکستان: داعش تا دیروز طالبان بود

پنجشنبه ۱۴۰۱/۰۹/۲۴

رحمت‌الله عبدالله‌اف، کارشناس تاجیک به رسانه آسیاپلاس گفته است که موضع محکم دوشنبه در مورد تشکیل حکومتی فراگیر در افغانستان منجر به توطئه شده و بعضی حملات در افغانستان به شهروندان تاجیکستان نسبت داده می‌شود. این کارشناس می‌گوید داعش تا دیروز طالبان بود.

او در توجیه اظهارات خود گفته قبل از قدرت گیری طالبان، انفجارها و حملات تروریستی توسط این گروه انجام می‌شد.

این رسانه تاجیکستان روز پنجشنبه ۲۴ قوس در مطلبی مفصل به این پرداخته که چرا مسئولیت حملات اخیر در کابل به شهروندان تاجیکستان نسبت داده می‌شود.

روز دوشنبه ۲۱ قوس به یک اقامتگاه چینی‌ها در کابل حمله شد.

ذبیح‌الله مجاهد، سخنگوی طالبان سپس اعلام که مهاجمان سه نفر بودند و همه کشته شدند. بعد از آن رسانه‌های نزدیک به داعش ویدئویی منتشر کردند که می‌گویند دو مهاجم از تاجیکستان بودند.

قبل از آن در روز جمعه ۱۱ قوس به مسجدی متعلق به گلبدین حکمتیار، رهبر حزب اسلامی افغانستان حمله شد. یک هفته پس از آن؛ روز جمعه ۱۸ قوس گلبدین حکمتیار مدعی شد که «حمله کنندگان تاجیک بودند.» آقای حکمتیار گفت که تحقیقات اولیه نشان می‌دهد که هر دو تروریست اهل تاجیکستان بودند.

رسانه آسیا پلاس تاجیکستان از کارشناسان این سوال را پرسیده که مبنای این اظهارات چیست؟ آیا این فشاری بر تاجیکستان برای موضع محکمش در برابر حکومت طالبان است؟

رحمت‌الله عبدالله‌اف معتقد است که موضع تاجیکستان در مورد ایجاد حکومت فراگیر منجر به چنین توطئه‌هایی از سوی نمایندگان حکومت طالبان شده است.

به گفته وی، طالبان می‌خواهند به تاجیکستان هشدار دهند.

عبدالله‌اف می‌گوید: کسانی که حداقل یک هفته یا یک ماه در افغانستان زندگی کرده‌اند، می‌دانند که در آنجا، به ویژه در شهرهای تحت حکومت طالبان، حتی یک تاجیک این فرصت را ندارد که تا این حد مسلحانه عمل کند و به گلبدین حکمتیار و چینی‌ها حمله کند.

او گفته این یکی از توطئه‌های حکومت طالبان است.

رحمت‌الله عبدالله‌اف معتقد است که ردپای داعش در دو حادثه اخیر برنامه‌ریزی شده بود، این گروه تروریستی برای افزایش اقتدار خود و ایجاد رعب و وحشت در جامعه جهانی، آماده پذیرش مسئولیت هرگونه حمله تروریستی است.

این کارشناس تاجیک همچنین گفت: «داعش تا دیروز طالبان بود. کسانی که با حکومت کنونی و سیاست‌های طالبان موافق نیستند را می‌توان به هر جنایتی متهم کرد.»

قاسمی بک محمد، یکی دیگر از کارشناسان تاجیک در مورد اظهارات گلبدین حکمتیار گفته است که رفتار حکمتیار نوعی چاپلوسی با طالبان است.

این کارشناس می‌گوید حکمتیار یک سیاستمدار و یک بازیگر مستقل سیاسی نیست و وابستگی‌اش به دیگر کشورها به ویژه پاکستان همواره مطرح بوده است.

به گفته او رویدادهای تروریستی اخیر در کابل و اظهارات رهبر حزب اسلامی افغانستان را می‌توان سفارشی دانست.

جهان‌نما
جهان‌نما
خبرها

پربیننده‌ترین ویدیو‌ها

رادیو

وقت روایت شماست

فیلم‌ها و صداهای خود را برای ما
ارسال کنید